Na Hulanda ABN Amro haya multa di 8,5 miyon euro

AMSTERDAM – Banco ABN Amro a haya un multa di 8,5 miyon euro di De Nederlandsche Bank pa controlnan insuficiente contra labamento di placa.

Segun DNB, e banco no a haci bastante pa investiga transaccionnan sospechoso. Tabatin señalnan cu algun cliente por a evita sancionnan contra Rusia via intermediario, y otro caso cu suma grandi di placa a wordo saca cash of manda pa paisnan cu riesgo halto di labamento di placa.

E control a tuma lugar entre september 2023 y september 2024. ABN Amro a reconoce e erornan, y pa e motibo ey e multa a baha di 10 miyon pa 8,5 miyon euro. E banco ta bisa cu e ta trahando riba medidanan pa drecha e situacion.

DNB ta critica cu ABN Amro a confia demasiado riba splicacion di cliente sin haci investigacion mas profundo. Un experto di contabilidad forense a califica e banco como “demasiado credulo”.

Cinco aña pasa, ABN Amro tambe a keda investiga pa controlnan debil contra labamento di placa y a yega na un arreglo di 480 miyon euro cu husticia.