14 morto den atakenan entre Merca y Iran

TEHERAN – Autoridadnan iraní a confirma cu por lo menos 14 persona a perde nan bida y 78 otro a resulta herida despues di un serie di atakenan aereo di Merca contra diferente blanco militar na costa di Iran.

Segun e Comando Central Mericano, e operacionnan a apunta na aproximadamente 90 blanco militar, incluyendo sistema di defensa aerea, deposito di misilnan y dronenan, y otro infraestructura militar cerca di e Straat di Hormuz. Washington a bisa cu e accionnan tabata destina pa limita capacidad di Iran pa pone navegacion maritimo den peligro.

Iran a contesta durante e anochi cu atakenan contra Bahrain, Kuwait y Qatar. Kuwait a informa cu su fuerza militar a intercepta varios dron y misil, mientras cu alarma a sona dos biaha na Bahrain.

E intercambio di atakenan ta pone e reciente paro al fuego entre e dos paisnan bou hopi presion, mientras cu posibilidad di negociacionnan pa un acuerdo permanente ta bira cada biaha mas incierto.