Cuater sospechoso deteni den investigacion di tiramento na San Nicolas

SAN NICOLAS – Departamento di Recherche di San Nicolas a detene cuater sospechoso como parti di e investigacion riba un caso di tiramento cu a tuma lugar diaranson 21 di juni 2026 dilanti di Pacifico Restaurant na San Nicolas.

Durante un operacion hudicial ejecuta diabierna mainta den Caya St. Maarten, polis a haci uzo di e Team di Aresto, Unidad K-9 y polis uniforma di distrito San Nicolas. E accion a culmina cu detencion di tres sospechoso.

E incidente a sosode alrededor di 3:55 di atardi, ora Central di Polis a despacha patrullanan pa atende un informe di tiramento. Segun e investigacion, dos vehiculo tabata envolvi: un Nissan March blauw y un Toyota Altezza color shinishi. Na yegada di polis, ningun di e dos auto tabata presente na e lugar. Durante un buskeda den e area, agentenan a topa varios huls di bala y diferente marca di impacto di proyectil.

Poco tempo despues, polis a localisa e Toyota Altezza abandoná na Caya Bonaire. E vehiculo a wordo confisca como evidencia pa e investigacion.

Despues di varios dianan di investigacion intensivo, Recherche di San Nicolas a detene e siguiente sospechosonan:

D.R., di 27 aña, naci na Aruba;

L.T.D., di 23 aña, naci na Aruba; y

K.R., di 18 aña, naci na Aruba.

Mas laat e mesun dia, un cuater sospechoso a presenta su mes voluntariamente na Warda di Polis San Nicolas y a entrega su mes na autoridadnan. Ta trata di M.P.Y., di 17 aña, tambe naci na Aruba.

Investigacion den e caso ta sigui den pleno marcha pa determina e rol exacto di cada sospechoso y e motibo tras di e tiramento.

Cuerpo Policial Aruba ta sigui haci un apelacion na comunidad. Cualke persona cu tin informacion relevante tocante e caso por yama e Tipline di Polis 11141. Tur informacion lo wordo trata confidencialmente y por wordo entrega anonimamente.