Cruz Cora Aruba ta lansa fondo special pa Venezuela: “Cada donacion ta haci diferencia”

ORANJESTAD – Durante un conferencia di prensa dialuna mainta, Marketing & Fundraising Manager di Cruz Cora Aruba, Indra Pereira, a anuncia cu e organizacion a activa un fondo special pa recauda donacionnan financiero pa e operacion di emergencia na Venezuela. E accion ta forma parti di un campaña mundial coordina door di International Federation of Red Cross and Red Crescent Societies (IFRC).  Anthony a splica cu, den e fase actual di e emergencia, Cruz Cora Aruba ainda no por ricibi donacionnan di articulonan manera pampers, cuminda, remedi of otro producto fisico. “Pa awor nos ta pidi pueblo tin un tiki pashenshi. Ainda no ta e momento pa recohe donacionnan di material. Ora e necesidadnan exacto na Venezuela ta cla, nos lo comunica esaki cu pueblo,” el a bisa.

CAMPAÑA ‘HUNTO PA VENEZUELA’

Mientrastanto, e organisacion ta invita comunidad Arubiano pa contribui financieramente door di e Venezuela Relief Fund, un fondo internacional cu a wordo activa especificamente pa sostene e operacion di socorro. “Nos ta participa den un yamamento mundial di International Federation of Red Cross. Tur donacion, grandi of chikito, ta yuda. Hunto nos por brinda speransa na e pueblo Venezolano.” Pa esnan cu kier contribui, e donacionnan por wordo transferi na: Aruba Bank Cuenta: 0384010990,  na nomber di: Venezuela Relief Fund – Campaña Hunto pa Venezuela

MILES DI PERSONANAN TA BUSCA AYUDO

Pereira a indica cu, segun e informacion cu Cruz Cora Aruba ta ricibi for di su boluntarionan na Venezuela, miles di persona ta sigui yega na e stadion cu a wordo converti den un centro di asistencia humanitario. “Nos hendenan a yega y a bai directamente pa e stadion. Aya nan ta forma parti di un operacion internacional di Cruz Cora pa atende e gran cantidad di personanan cu ta busca ayudo.” El a splica cu otro ekiponan di Cruz Cora tabata encargando cu operacionnan di buskeda y rescate. Sinembargo, segun e informacion ricibi, e fase di buskeda ta acercando su fin. “Mi ta compronde cu e operacion di buskeda ta wordo reduci, paso e posibilidad di encontra sobrevivientenan ta bira cada biaha mas chikito.”

SITUACION TA SIGUI HOPI DIFICIL

Pereira a bisa cu, apesar di e imagennan cu ta circula riba television y redes social, e no kier duna un opinion personal tocante e situacion general na Venezuela. “Mi no por papia na nomber di Cruz Cora tocante tur loke ta pasando. Pero loke mi sa si cu ta miles di persona ta sigui yega na e centro di asistencia pa busca ayudo.”