Hulanda ta manda equipo di rescate pa Venezuela

AMSTERDAM - Hulanda ta manda un equipo specialisa den rescate pa Venezuela pa brinda asistencia despues di e devastador terremotonan. Minister di Comercio Exterior y Cooperacion pa Desaroyo, Sjoerdsma, a pone te 2 miyon euro disponibel pa activa e equipo Urban Search and Rescue (USAR), cu ta consisti di rescatistanan, cachonan di busca y equipo specialisa.

“Mirando e magnitud di e desastre y e cercania di Venezuela como un pais bisiño di Reino Hulandes, Hulanda a ofrece  e asistencia di USAR inmediatamente na Venezuela,” minister Sjoerdsma a declara. “Nos pensamiento ta cu e victimanan, nan famianan y cu tur esunnan cu a wordo afecta pa e desastre aki. E necesidad di ayudo ta grandi.”

Ademas di manda e equipo di rescate, Hulanda tambe lo contribui financieramente pa facilita cu ayudo humanitario internacional por yega rapidamente na e area afecta. Esaki lo wordo haci pa medio di contribucionnan sin destinacion specifico na organizacionnan di ayudo, permitiendo nan usa e fondonan inmediatamente y cu flexibilidad pa brinda e prome asistencia.

Minister Sjoerdsma a bisa cu Gobierno Hulandes ta sigui monitorea e situacion de cerca y lo evalua, basa riba e desaroyonan, si ta necesario brinda mas asistencia. NOTA: E potret ta un dramatisacion di e situacion.