Gobierno: Ceramento di costa noord ta pa proteha naturalesa

ORANJESTAD – Despues di algun critica y pregunta di parti di publico tocante e decision reciente pa limita acceso na ciertonan area di costa noord, Gobierno di Aruba a brinda mas informacion riba e medida, cu segun nan ta necesario pa proteha area natural vulnerabel y cumpli cu regulacionnan existente.

Gobierno a confirma cu a tuma e decision pa temporalmente cera dos area di tereno di gobierno, hunto aproximadamente seis kilometer, clasifica den e Plan pa Desaroyo Teritorial (ROPV) como area di “Naturalesa y Paisahe”. Segun gobierno, e decision no solamente ta basa riba necesidad di conservacion, sino tambe a wordo acelera door di un procedura legal reciente.

E areanan en cuestion tin balor natural, ecologico y historico importante. Aunke nan no tin status oficial como reserva natural, gobierno ta considera cu e luganan aki mester wordo proteha pa evita daño na ecosistema, flora y fauna local.

Segun e splicacion oficial, e ceramento temporal tin varios obhetivo. Entre nan ta garantisa cumplimento cu e regulacion vigente, preveni degradacion di tera y vegetacion, facilita recuperacion di ecosistemanan vulnerabel y reduci disturbio durante periodonan importante pa reproduccion di ciertonan especie di animal.

Gobierno tambe a anuncia cu lo inicia un proceso pa establece y regula rutanan oficial den e areanan aki. E meta ta pa evita uso descontrola di e tereno y crea un sistema mas cla tocante unda y con publico por haci uso di e area den futuro.

Autoridadnan a enfatisa cu e medida no ta aplica pa henter costa noord. Segun gobierno, ainda tin suficiente otro rutanan y luganan disponibel pa recreacion y disfrute di e costanan panord di Aruba.

Ademas, gobierno a indica cu e decision ta conecta cu compromiso nacional y internacional relaciona cu proteccion ambiental, incluyendo obligacionnan vincula na e status di Ramsar di ciertonan area natural di Aruba.

Mientras e proceso di organisacion y designacion di rutanan ta sigui, gobierno ta pidi publico pa respecta e bareranan y indicacionnan coloca na e area. Una vez cu e trabounan ta completa, acceso lo wordo habri nuevamente conforme cu reglanan cu lo aplica pa e area.

Pa informacion adicional, interesado por tuma contacto cu Directie Infrastructuur en Planning (DIP), mientras Servicio di Obras Publicas (DOW) ta encarga cu implementacion di e medidanan.