Aruba den centro di investigacion internacional albanes di cocaina

ARUBA – Aruba ta wordo menciona regularmente den un investigacion grandi di crimen organiza na Albania, pero te awor no tin indicacion cu algun delito a wordo cometi na Aruba mes. E nòmber di e isla ta surgi principalmente pasobra un reunion cu a tuma lugar na Aruba añanan atras y cu actualmente ta forma parti di un dosier criminal internacional.

DOCUMENTO DI FISCALIA ALBANES

Segun documentonan di Fiscalia Special di Albania (SPAK), autoridadnan ta investiga un supuesta red internacional di trafico di cocaina cu, segun acusacionnan, a move droga for di Suramerica pa Europa y posteriormente a laba e ganashi mediante inversionnan den construccion, bienes raiz y resorts di lujo. Un di e nombernan principal den e investigacion ta Artur Shehu, tambe conoci como Luciano Koceku. Segun fiscalianan, e  tabata conecta cu un organizacion criminal cu ta opera den varios pais.

PAKICO ARUBA TA DEN E NOTICIA?

Aruba ta aparece den e dosier pasobra investigadornan a documenta un reunion cu tabata tuma lugar na Aruba entre diferente personanan cu posteriormente a bira suheto di un investigacion criminal. Segun medionan albanes, autoridadnan tin foto y otro evidencia di reunionnan cu a tuma lugar na Aruba, Mallorca y Belgica. E reunion na Aruba a bira particularmente famoso na Albania pasobra fiscalianan ta alega cu algun di e participantnan tabata figura prominente den mundo criminal. Esaki no ta nifica cu Aruba tabata centro di e operacion di droga ni cu e actividadnan criminal tabata tuma lugar riba e isla. Te awor, loke ta sali for di e investigacion ta cu Aruba tabata e localidad unda e reunion a tuma lugar.

KICO INVESTIGADORNAN TA ALEGA?

Segun SPAK, e red criminal tabata trafica cocaina for di paisnan manera Colombia, Ecuador, Bolivia, Surnam, Paraguay, Uruguay, Puerto Rico y Brasil pa mercado europeo. E ganashi cu tabata wordo genera for di e trafico di droga lo a wordo inverti den Albania mediante proyecto inmobiliario y resorts di lujo. Como parti di e investigacion, autoridadnan a confisca activo valorisa den miyonan di euro y a detene varios sospechoso. Investigadornan tambe ta examina relacionnan entre empresario, inversionista y personanan sospecha di participa den lavado di placa.

ARUBA DEN DEBATE POLITICO

E importancia di e reunion na Aruba a bira asina grandi cu e isla a wordo menciona recientemente den un debate feroz den Parlamento di Albania. Durante e discusion, politico Damian Gjiknuri a declara cu “ora e berdad tocante Aruba sali na cla”, mas informacion lo wordo revela. E declaracion ey a crea curiosidad internacional y a pone e nòmber di Aruba nuevamente den titularnan di prensa albanes. Sinembargo, te na momento di publica e informacion disponible, autoridadnan albanes no a presenta evidencia publica cu ta indica cu gobierno di Aruba, autoridadnan local of institucionnan arubiano tabata involucra den e supuesta actividadnan criminal.

E PUNTO PRINCIPAL

Pa e momento, Aruba ta aparece den e caso principalmente como e sitio unda un reunion entre diferente personanan investiga a tuma lugar. E investigacion principal ta enfoca riba supuesto trafico internacional di cocaina, labamento di placa y inversionnan den resorts di luho na Albania. Mientras cu e investigacion ta sigui avanza, probablemente mas detaye lo sali na cla tocante exactamente kico a wordo discuti durante e reunion na Aruba y cual papel e participante individualnan a hunga den e supuesta red criminal