Pashentnan caribeño tin mas dificultad pa haya donor di stamcel

ORANJESTAD – Cu e lanzamiento oficial di Matchis Caribbean, a cuminsa un iniciativa nobo cu ta busca pa aumenta e cantidad di donor di stamcel considerablemente cu ta bini for di Caribe. E meta ta pa duna pashentnan cu rais caribeño un mihor oportunidad pa haya un donor compatible pa un transplante di stamcel cu por salva bida. Segun Matchis Caribbean, personanan cu fondo caribeño ta poco  representa  den registronan internacional di donor. Como consecuencia, pashentnan for di Caribe of cu origen caribeño hopi biaha tin mas dificultad pa haya un donor cu ta encaha cu nan.

HOSPITAL TA SOSTENE INICIATIVA

E proyecto ta conta cu apoyo di e hospital Horacio Oduber Hospital, cu ta enfatisa cu cuido di salud no ta solamente trata enfermedad, sino tambe crea mas oportunidad pa pacientenan y fortalece comunidad.

KICO TA UN TRANSPLANTE DI STAMCEL?

Un transplante di stamcel ta un tratamento medico den cual stamcelnan sano ta wordo usa pa reemplasa medula oseo esnan cu a keda daña. E tratamento ta wordo aplica pa enfermedadnan serio manera leukemia, cancer di glandula linfatico, cierto enfermedadnan di sanger y trastornonan hereditario di sistema inmunologico. Durante e presentacion oficial, e organisadornan a haci un  yamada na comunidad pa registra como donor. E proceso ta simpel y ta consisti di un prueba di saliva for di paden di e cachete y algun dato personal.

ACCION DI REGISTRO

Matchis Caribbean ta organiza accionnan di registro na Aruba pa personanan interesa por inscribi como donor y asina aumenta e posibilidad pa salva bida den futuro.