Gobierno Hulandes kier frena costo halto di veterinario, pero ainda no tin medida concreto

AMSTERDAM – Gobierno Hulandes a anuncia cu e kier tuma accion contra e prijsnan cada biaha mas halto cu veterinario ta cobrando pa trata mascota, pero ainda no a presenta medida concreto.

Segun Secretario di Estado Jean Rummenie Erkens, mascota ta un parti importante di hopi famia y p’esey propietario di animalnan mester haya informacion mas cla tocante cual tratamiento ta necesario y cuanto esaki lo costa.

Gobierno kier introduci legislacion nobo pa limita incentivo financiero basa riba entrada y ganashi, y tambe pa aumenta transparencia den sector di cuido veterinario. E meta ta pa propietario di mascota por compara mihor, haci escohencia mas informa y evita sorpresa cu cuenta halto, specialmente den caso di emergencia.

Un investigacion di Ministerio di Agricultura a mustra caba aña pasa cu costo di veterinario ta sigui subi rapidamente. Especialmente cuido di emergencia por resulta den cuenta di cientos di euro mas halto pa propietario di animalnan.

Parlamento Hulandes anteriormente a pidi pa considera tarifa maximo pa tratamentonan veterinario, pa consumidornan sa di antemano cuanto nan lo paga. Desde 1998 veterinario den Hulanda ta liber pa determina nan mes prijsnan.

E investigacion tambe a revela cu prijsnan den sector veterinario a subi te tres biaha mas lihé cu inflacion entre 1991 y 2024. E aumento mas grandi ta ser observa serca cadena comercial di veterinario, caminda tratamiento fuera di oranan regular por costa aproximadamente 40% mas cu serca un veterinario independiente.

Apesar di preocupacionnan tocante e costo creciente, gobierno ainda no ta introduci control di prijs. En cambio, e lo traha hunto cu sector veterinario den e añanan venidero pa garantisa cu cuido veterinario di calidad keda accesibel y disponibel, tanto pa consulta regular como pa emergencia.