San Nicolas ta prepara pa su prome Food Festival dia 3 di juli

ORANJESTAD – Minister Geoffrey Wever, a anuncia oficialmente e prome edicion di San Nicolas Food Festival, cu lo tuma lugar dia 3 di juli 2026 na Carnival Village for di 6:00 di atardi te 12:00 di anochi.

E evento ta enfoca riba e rico herencia culinario multicultural di San Nicolas, cu a desaroya durante decenionan gracias na influencia di diferente comunidadnan cu a establece nan mes den e distrito.

Un total di 29 empresario, incluyendo restaurante y vendedor di cuminda local, a confirma nan participacion. Bishitantenan lo por disfruta di un variedad amplio di plato local y internacional, musica en bibo y actividadnan pa henter famia.

Pa muchanan lo tin un Kids Corner gratis cu Dino Jump y otro actividadnan recreativo. Entrada pa e festival ta completamente gratis.

Segun Minister Wever, e Food Festival no solamente ta celebra cultura y gastronomia, pero tambe ta un iniciativa pa impulsa actividad economico y fortalece e revitalisacion di San Nicolas como Ciudad di Patrimonio Cultural di Aruba.

Gobierno ta spera cu tanto residente como turista lo bishita e festival y conoce e oferta culinario unico cu San Nicolas tin pa ofrece.