Gobernador di Aruba ta topa “Captain Blue Face” durante celebracion di 250 aña di independencia di Merca

WILLEMSTAD – Durante su bishita oficial na Corsou e siman aki, Gobernador di Aruba Alfonso Boekhoudt a participa den e celebracion di 250 aniversario di independencia di Merca. E actividad a reuni varios invitadonan distingui, incluyendo Consul General di Merca  Ramón “Chico” Negrón,  Gobernador di Corsou   Mauritsz de Kort, y representante diplomaticonan y lidernan comunitario, .

CAPTAIN BLUE FACE 

Durante e ocasion, Gobernador Boekhoudt a reuni cu un figura hopi conoci den Corsou: Brentan “Captain Blue Face” Balentin. Balentin ta ampliamente reconoci como un di e fanaticonan mas apasiona di futbol na Corsou y pa hopi hende e ta e fanatico numero uno di e seleccion nacional cu lo participa den Mundial FIFA 2026.

Captain Blue Face a bira un simbolo di orguyo nacional na Corsou danki na su presencia constante na partidonan di e seleccion, su cara pinta den colornan blauw y geel caracteristico y su entusiasmo contagioso cu a inspira miles di fanatico tanto localmente como internacionalmente. Durante e campaña historico cu a hiba Corsou pa su prome Mundial, Balentin a acompaña e ekipo den diferente competencia y evento promocional.

Na e encuentro, Boekhoudt a pose pa un potret hunto cu Captain Blue Face, Gobernador di Corsou y Consul General   Negrón, reflehando e ambiente amistoso y festivo cu a marca e celebracion.

E evento tabata parti di e conmemoracion di 250 aña desde cu Merca a declara su independencia di Gran Bretaña na 1776. Den henter Merca y tambe den diferente paisnan y territorio cu tin relacion historico y diplomatico cu e pais,  actividadnan special pa marca e occasion ta wordo organiza.

Pa hopi observador, e foto entre e Gobernador di Aruba y Captain Blue Face ta representa mas cu solamente un encuentro casual. E ta simbolisa e unidad cultural y deportivo cu ta existi entre e islanan ABC, especialmente den un momento unda Corsou ta prepara pa representa Caribe Hulandes riba e escenario mas grandi di futbol mundial durante Mundial 2026.