Peabo Bryson, voz legendario di Disney y R&B, a fayece na edad di 75 aña

LOS ANGELES - Cantante famoso di soul y R&B, Peabo Bryson, a fayece diamars 2 di juni na edad di 75 aña, rodea pa su famia, poco dia despues cu el a sufri un derrame cerebral. Su famia a confirma e noticia y a expresa gratitud pa tur e amor y apoyo cu fanaticonan rond mundo a mustra.

Bryson, kende nombre original tabata Robert Peapo Bryson, a nace na Greenville, South Carolina, na 1951. Desde mucha e  tabata apasiona pa musica y e la cuminza canta profesionalmente ainda adolescente. Durante su larga carrera musical, el a bira un di e voznan mas reconoci den musica soul y den duetonan romantico.

E la bira mundialmente famoso cu dos cancionnan iconico di Disney. Na 1991, el a canta “Beauty and the Beast” hunto cu Celine Dion pa e pelicula di Disney cu mesun nomber. E cancion a bira un hit enorme y a gana un premio Grammy. Un aña despues, e la logra otro exito historico cu “A Whole New World” di e pelicula Aladdin, canta hunto cu Regina Belle. E cancion aki a bira e prome cancion di un pelicula animado cu a yega numero 1 riba Billboard Hot 100.

Bryson tabata tambe conoci pa su colaboracionnan cu artista manera Roberta Flack y Natalie Cole. Entre su hitnan mas recorda tin “Tonight, I Celebrate My Love”, “If Ever You’re in My Arms Again” y “Can You Stop the Rain”.

Den total, Bryson a lansa 20 album y a ricibi ocho nominacion Grammy durante su carrera. Aunke industria musical hopi biaha a pone enfoke riba artistanan hoben, Bryson semper a keda fiel na su estilo unico y profundo.

Peabo Bryson ta laga tras su casa Tanya Boniface y su yiunan. Su legado musical lo sigui biba pa generacionnan futuro.