Evelyn Wever-Croes ta rechasa acusacion di vd Burg cu e la duna ambtenaarnan instruccion pa HOFA

ORANJESTAD – Den un declaracion official diamars mainta, Evelyn Wever-Croes a rechasa afirmacion di Eric van der Burg cu e, como Prome Minister di Aruba, tabata esun cu a duna instruccion na funcionarionan pa prepara e ley di supervision financiero HOFA.

Segun Wever-Croes, e declaracion di e Secretario di Estado no ta corresponde cu e  hechonnan documenta oficialmente. E la  enfatisa cu iniciativa pa crea un Rijkswet di supervision financiero pa Aruba originalmente a bini for di banda hulandes bou di e tempo ey Secretario di Estado Raymond Knops.

E la señala cu Raad van State di Reino a entrega su conseho tocante e proposicion dia 10 di maart 2021 y cu e propuesta oficialmente a wordo entrega na Tweede Kamer dia 9 di februari 2022. Segun Wever-Croes, Knops mes a confirma publicamente cu su meta tabata pa establece supervision financiero via un Rijkswet pa Aruba.

E ex prome minister a agrega cu tur e informacion aki por wordo confirma den documentonan oficial di Parlamento Hulandes y den consehonan di Raad van State di Reino.

Den su declaracion, Wever-Croes tambe a expresa cu e ta spera cu un Secretario di Estado encarga cu Relacionnan di Reino ta basa su pronunciamientonan riba hecho y no riba informacion incorrecto.