Denzel Dumfries ta logra su transfer di soño: Real Madrid

MADRID - Denzel Dumfries ta cerca di cuminsa un capitulo grandi den su carrera futbolistico. E defensor banda drechi di seleccion hulandes “Oranje” lo laga Inter Milan pa firma cu gigante spaño Real Madrid pa cuatro aña.

Segun varios medio deportivo den Italia y Hulanda, Real Madrid a dicidi di paga e clausula di compra den su contrato cu Inter, cu ta rond di 20 miyon euro. Dumfries, cu tin 30 aña, lo firma contrato te mei di 2030 na estadio Santiago Bernabéu.

Dumfries tabata un pieza importante na Inter durante cinco aña. Cu e club italiano el a gana dos titulo di Serie A y tambe a yega final di Champions League aña pasa. Durante su tempo na Inter, el a hunga 207 wega, cu 27 gol y 28 assist.

Na Real Madrid, Dumfries lo tin competencia fuerte cu Trent Alexander-Arnold, kende anteriormente a transfer di Liverpool. Club madrileño ta busca recupera despues di un temporada decepcionante sin premio, bou di entrenador José Mourinho.

Cu e transfer aki, Dumfries por bira e di nuebe hungador hulandes den historia cu a bisti camisa di Real Madrid. Entre e otro hulandesnan cu a hunga aya tin Clarence Seedorf, Wesley Sneijder, Arjen Robben y Rafael van der Vaart.

E transfer tambe ta bon noticia pa su ex-clubnan. PSV lo ricibi alrededor di 200 mil euro, Sparta Rotterdam 300 mil euro, mientras Heerenveen y varios club amateur tambe lo haya entrada gracias na sistema di compensacion di FIFA.

Dumfries, kende a cuminsa su carrera profesional relativamente laat, a bira un di e jugadornan mas importante den seleccion di Ronald Koeman. Te awor el a hunga 71 interland pa Hulanda y a marca 11 gol pa Oranje. El lo participa como titular den Mundial di FIFA na Merca, Canada y Mexico.