Joia Aruba ta combati desperdicio di cuminda cu tecnologia di AI y control estricto

ORANJESTAD – Joia Aruba by Iberostar ta intensifica su esfuerzo pa reduci desperdicio di cuminda pa medio di un sistema digital avansa usando Inteligencia Artificial cu ta permiti monitorea y analiza tur producto cu ta wordo tira fo den cocina.

Segun Executive Chef Ludwich Samson, tur producto cu e hotel ta usa, ta registra den un sistema special cu ta yuda identifica exactamente unda e desperdicio ta origina. Durante e proseso, e personal ta separa e desperdicio den diferente categoria y registra tur detaye den un dispositivo portatil.

“Nos por mira si e desperdicio ta bin di sobreproduccion, resto cu cliente a laga riba plato, of recortenan manera casca di fruta y otro producto,” Samson a splica. “Di e manera aki nos por monitorea tur cos cu ta wordo tira afo y despues tuma accion concreto.”

E informacion colecta ta wordo manda automaticamente via report na nan oficina y tambe ta disponible den e sistema digital pa chefnan y management por analiza. Segun Samson, e meta principal ta pa identifica patronchinan  y reduci desperdicio tanto cu ta posible.

Chef Samson a agrega cu ciertonan producto cu ainda por wordo reutilisa ta wordo manda pa cafeteria of otro departamento den hotel, como parti di e esfuerzo pa minimisa desperdicio di cuminda.

Cu e iniciativa aki, Joia Aruba by Iberostar ta sigui posiciona su mes como uno di e hotelnan cu mas enfoke riba sostenibilidad y eficiencia operacional na Aruba.