Stewardess di KLM hospitalisa pa posible contagio cu hantavirus

SCHIPHOL - Un stewardess di KLM for di Haarlem a wordo hospitalisa den Amsterdam UMC debido na un posible contagio cu hantavirus. E stewardess tabata den contacto na Johannesburg cu e señora Hulandes di 69 aña cu a muri dia 26 di april debido na e virus.

Segun Ministerio di Salud Publico na Hulanda, e stewardess tin sintomanan leve y ta den aislamiento preventivo mientras cu nan ta haci testnan. KLM no a desea comenta riba casonan individual.

E señora cu posteriormente a muri, tabata a bordo di un avion di KLM na Johannesburg un dia prome cu su morto. Pero debido cu su condicion di salud a empeora rapidamente, e crew a dicidi no laga e subi den e buelo pa Amsterdam.

E stewardess cu tabata trahando riba e buelo aki awor a wordo hospitalisa preventivamente.

E buelo tabata programa pa sali for di Johannesburg dia 25 di april pa 11:15 di anochi rumbo na Amsterdam. Despues cu nan a kita e pasajero for di avion, e buelo a sigui su rumbo pa Hulanda.

E señora malo a muri un dia despues den un hospital na Johannesburg. Prome cu esey, ela tabata a bordo di e crucero Hondius, unda varios persona a wordo contagiá cu hantavirus. Te awor, tres persona cu tabata conecta cu e crucero a perde nan bida.