Segun Wyatt-Ras riba debate HOH–ImSan, cooperacion ta bon, fusion no ta solucion!

ORANJESTAD - Despues di e discusion publico cu a surgi entre director di Hospital Horacio Oduber (HOH), Jacco Vroegop, y medico Ike Posner, awor minister Mervin Wyatt-Ras a reacciona oficialmente riba e tema,y a haci esaki riba su pagina di facebook.

Den e mensaje comparti riba facebook, e minister a reconoce e.o.  cu e debate a tuma luga mas riba plataforma digital cu na mesa di dialogo, pero a enfatisa cu den practica tin bon cooperacion entre Hospital y ImSan. “Den practica actualmente tin bon cooperacion entre profesionalnan di ambos instituto. Hasta tin un MOU di cooperacion firma entre ambos entidad,” Wyatt-Ras a expresa.

E minister a destaca cu autonomia di ImSan a permiti e instituto desaroya su mes, incluso logra acreditacion internacional, mientras cu Hospital tambe ta sigui crece den su propio caminda. Segun su analisis, precisamente e independencia di cada institucion ta forma un fortaleza: “Independencia di cada uno ta e forsa pa nan por sigui desaroya y challenge otro riba e aspecto di calidad.”

Wyatt-Ras tambe a pone enfoke riba rol di AZV como balansa financiero den sistema di salud, y a advirti cu fusion entre institucionnan—manera visto den otro paisnan—no semper ta trece resultado positivo.

“Mester tene na cuenta cu fusion den otro paisnan no a trece mihor resultado tanto pa calidad, relacion cu pashent, finansas y organisacion di institutonan,” e minister a señala.

Segun e, e combinacion di autonomia institucional y cooperacion estrecho ta brinda mas beneficio pa pashent, y esaki mester wordo fortifica mas ainda den futuro.

E reaccion di Wyatt-Ras ta bin despues cu Noticiacla anteriormente a reporta riba diferencia di vision entre Vroegop y Posner, unda cuestionnan riba  structura, colaboracion y direccion di cuido di salud na Aruba tabata central.

Cu e declaracion aki, gobierno ta manda un señal cla: No na fusion, pero mas cooperacion entre dos sistema cu ta opera independiente—un modelo cu, segun e minister, ta funciona y mester wordo fortalece, no cambia.