Cifranan di CBS nobo ta confirma: Bida na Aruba ta sigui bira mas caro

ORANJESTAD – Bida diario na Aruba ta sigui bira mas caro, y e impacto ta sinti cada dia mas fuerte den bista di e ciudadano. Cifranan reciente di Oficina Central di Estadistica ta confirma cu inflacion a subi atrobe na luna di maart, reflehando un tendencia cu ta preocupa pa poder di compra di famianan. Segun e ultimo informe di CPI , prijsnan a registra un subida di 0.7% den un luna y 1.1% riba base anual. E subida aki ta wordo impulsa principalmente door sector manera transporte, paña y sapato, recreacion y cultura, y vivienda—tur factor cu ta toca directamente gasto diario di ciudadano.

COSTO DI BIDA

Mas preocupante ainda ta e subida continuo di e costo di bida. E “bestaansminimum”, cu ta indica cuanto un famia mester pa cubri nan necesidadnan basico, a subi pa Afl. 5,602 pa un hogar cu dos adulto y dos mucha. Esaki ta confirma cu mantene un bida digno ta bira cada vez mas dificil.  Pa un solo adulto, e situacion ta aun mas delicado. Cu un necesidad mensual di Afl. 2,668, hopi persona ta confronta un deficit real entre entrada y gasto, algo cu ta mustra cu salario no ta sigui ritmo di e subida di prijsnan.

CUMINDA

Cuminda ta keda uno di e factor principal tras di e presion economico. Den e ultimo aña, prijs di producto esencial manera berdura, carni y bebida a subi notablemente, haciendo e compra diario mas costoso pa cada hogar. Ademas, subida fuerte den prijs internacional di petroleo—cu a subi casi 40%—ta pone presion adicional riba economia local. E efecto di esaki ta sinti especialmente den gasolina y diesel, cu ta impacta transporte y, indirectamente, precio di otro producto y servicio.

PRIJS DI PRODUCTO DI CANASTA A SUBI DI PRIJS 

Cifranan ta mustra cu mas di mitar di productonan den e canasta di consumo a subi di prijs, señalando cu inflacion no ta limita na un solo sector, sino cu ta afecta casi tur aspecto di bida. E realidad ta cla: bida na Aruba ta bira mas caro, mientras cu entrada no ta sigui e mes ritmo. Esaki ta pone presion creciente riba famianan, cu cada luna mester hasi mas sacrificio pa yega na fin di luna.