Dowers: Otro siman si ta piki tur e-bikes y e-scooters for di riba caminda publico

ORANJESTAD – Otro siman, gobierno ta bai drenta accion directo pa piki tur e-bikes, e-scooters y otro aparato cu ta para ilegalmente riba tereno publico. Esaki a keda cla den un entrevista cu periodista Tito Laclé a tene cu minister di Husticia, Arthur Dowers, den e programa Noticiacla LIVE diahuebs anochi. Laclé a puntra e mandatario kico ta bay haci, awor cu a resulta cu e companianan cu ta huur e aparatonan en cuestion, no a duna oido na e yamada pa kita nan for di caminda. Pues dos dia despues cu a bisa cu e prohibicion di tin e vehiculonan riba caminda publico ‘per direct’, ainda nan tey, como si fuera cu nada no a pasa. Te hasta a sugeri cu tin manera mas steps y scooter parkeerd riba caminda publico. Segun minister Dowers, e situacion actual ta contra ley y no por sigui asina. “No ta asina cu bo por yega, parker unda bo kier riba tereno publico y hasi negoshi,” e minister a declara. Y como tal otro siman, ta cuminsa ‘piki’ tur e-scooter y e-steps for di caminda publico. 

NO TIN PERMISO

E mandatario a bolbe enfatisa cu hopi di e companianan cu ta huur scooters, bisicleta y otro vehiculonan motoriza , no tin e permiso obligatorio di Ministerio di Transporte Publico. “Si nan tin motor, nan mester tin permiso. Nos no a mira cu ningun di nan tin e permiso aki,” Dowers a bisa.  Ademas, e minister a pone en duda alegacion di algun compania cu ta bisa nan tin permiso di un gobierno anterior. “Nos a check y nos no ta haya evidencia cu nan tin un permiso valido pa loke nan ta haci,” el a agrega.

‘FREE FOR ALL’ RIBA CAMINDA

Segun Dowers, e situacion a bira un desorden total riba caminda, unda aparato ta para sin control, sin placa y sin regulacion. “Ta un tipo di ‘free for all’ cu no por continua,” e la indica.

ACCION TA BINI

Gobierno a manda un aviso cla: enforcement lo sigui. No ta trata di palabranan solamente. Diferente departamento, hunto cu autoridadnan competente, lo participa den e operacion. “Nos no ta bai papia so. Nos ta bai kita nan,” minister Dowers a declara enfatico. E plan ta pa duna un ultimo aviso, y despues procede cu accion directo riba caminda. “ Bo por conta cu nos lo hala tur aparato cu ta para riba tereno publico sin cumpli cu ley,” el a bisa.

OTRO SIMAN TA DECISIVO

Segun indicacion di e minister, e operacion lo cuminsa ya na principio di otro siman, despues di un periodo cortico di aviso. “Otro siman nos ta drenta accion. Bo por mira cu dialuna nos ta cuminsa,” Dowers a confirma. Gobierno ta enfatisa cu meta ta restablece orden, seguridad y respeto pa lei riba camindanan di Aruba, despues di un periodo unda regulacion tabata practicamente inexistente.