Venezuela kier reactiva comercio cu Aruba y Caribe Hulandes cu renovacion di waf Muaco

VENEZUELA / FALCON – Gobierno di Venezuela a anuncia plan pa recupera e waf di Muaco, cu tin como meta principal pa reactiva conexion comercial cu Aruba y otro isla den Caribe hulandes.

Segun presidenta interino Delcy Rodríguez, e proyecto ta considera como prioridad nacional y lo permiti reestablece relacion comercial, social y cultural entre region di Coro y isla manera Aruba, Corsou y Boneiru.

E waf, cu anteriormente tabata un punto clave pa comercio maritimo, a keda abandona desde 2014 pa motibo di falta di mantencion y crisis economico den pais.

Pa Aruba, e desaroyo aki por tin impacto directo, paso e conexion cu Venezuela a sido historicamente importante pa intercambio di producto y actividad economico. E renovacion di e waf lo por facilita di nobo trafico comercial y posiblemente turismo entre e dos regionnan.

Gobierno venezolano a indica cu lo asigna autoridadnan pa inicia e trabounan, mientras sector economico ta mira cu interes si e proyecto lo logra reanima comercio cu isla di Caribe Hulandes den futuro cercano.