Aruba ta marca rumbo pa sosten di Union Europeo pa teritorionan ultramarino te 2034

ORANJESTAD – Aruba, como presidente di organisacion di Paisnan y Teritorionan Ultramarino Europeo (OCTA), a tuma un paso importante rumbo na inversionnan europeo den futuro. Durante e foro OCT–EU y e conferencia ministerial relaciona, a firma un declaracion comun pa tur trece territorio ultramarino, cu prioridadnan pa e programa nobo di financiamiento europeo pa periodo di 2028 te cu 2034.

E foro, cu a tuma luga di 9 te cu 14 di april na Aruba, a reuni representantenan di e teritorionan ultramarino, estadonan miembro di Union Europeo y Comision Europeo. Entre nan tabatin tambe eurocomisario Jozef Síkela y un vicepresidente di Parlamento Europeo. E reunion a concentra riba cooperacion y inversionnan pa futuro.

E declaracion firma ta forma e posicion di e teritorionan ultramarino pa e asina yamá programa DOAG, cu ta defini con Union Europeo ta brinda sosten na e teritorionan aki. Den dje, e paisnan ta pidi atencion specifico pa nan reto economico y geografico, y ta yama decisornan europeo pa tene cuenta cu esaki den negociacionnan futuro.

Ademas, durante e foro a discuti riba proyectonan concreto di inversion cu ta encaha cu strategia Global Gateway di Union Europeo. Enfoke principal ta riba infrastructura, sostenibilidad y desaroyo economico.

E conferencia a sera cu un reunion di inversion unda gobiernanan, empresarionan y institucionnan a intercambia idea riba cooperacion den futuro.