Wyatt-Ras: Aruba a perde control contra violencia, adiccion y salud mental hopi tempo caba

ORANJESTAD – Aruba a perde control hopi tempo caba contra violencia domestico, addicion y salud mental. E mandatario encarga cu salud y asuntonan social drs Mervin Wyatt-Ras durante e programa Noticiacla LIVE cu periodista Tito Laclé,   a reconoce cu Aruba ainda no tin control total riba problema nan serio manera violencia domestico, adiccion y salud mental. De echo, e la confirma cu Aruba a perde e bataya aki basta tempo caba.  Laclé a plantea e pregunta directamente, referiendo na aumento di casonan desde 2020 y e percepcion den sociedad cu e pais por lo  a perde e bataya contra e problematica aki.  Den su contesta, e minister a reconoce cu e situacion ta serio y estructural. “Si, maltrato y abuso ta un problema cu cada biaha ta bira mas visibel. Ta un problema structural,” Wyatt-Ras a declara.

Segun e minister, gobierno ta cumpli cu leynan existente, pero tambe ta traha pa alinea Aruba cu tratadonan internacional, incluyendo e tratado di Istambul contra violencia di hende, specialmente contra muhernan. E la indica cu Aruba ta den proceso di fortalece su marco legal y institucional pa por ratifica e tratado aki.

Wyatt-Ras a enfatisa cu un di e prioridadnan principal ta mehora e sistema di refugio (shelter) pa victima nan di violencia domestico. “E shelter actual a keda atras. Nos a pone presupuesto, pero no ta suficiente. Nos mester fortalece esaki pa logra cambio real,” el a bisa. Ademas, gobierno ta traha hunto cu Departamento di Asuntonan Social pa crea mehor punto di contacto pa victima nan, pa nan por reporta caso nan y ricibi yudansa mas efectivo. Sinembargo, ora Laclé a insisti cu e pregunta si gobierno tin control riba e situacion, e minister a bisa cu no: “Laga nos bisa, e control, nos a perde hopi tempo caba. Pasobra si nos tabatin control completo, nos no mester tuma tur e medidanan aki. Realidad ta cu nos ainda mester haci hopi mas.” Segun Wyatt-Ras, un di e reto mas grandi ta crea mas concientisacion den sociedad. E la indica cu gobierno lo sigui traha riba educacion, cooperacion entre institucionnan y fortalecemento di e sistema di apoyo.

E declaracion di e minister ta confirma cu, apesar di pasonan tuma, Aruba ainda ta den medio di un lucha continuo contra violencia domestico, adiccion y problemanan di salud mental. Pa wak e programa completo, click AKI.