Secretario di estado Van der Burg den Noticiacla LIVE awe anochi — HOFA, Reino y Venezuela riba mesa

ORANJESTAD – Periodista Tito Laclé di Noticiacla a logra un entrevista amplio cu secretario di estado hulandes Eric van der Burg durante su bishita relampago na Aruba.

E entrevista a cubri varios tema cayente cu ta domina agenda politico actual, incluyendo e controversial Rijkswet HOFA, cooperacion den OCT-EU Forum, relacion entre Aruba y Hulanda den Reino, situacion den Venezuela, y otro asunto strategico cu ta afecta futuro di e region.

Bishita di Van der Burg forma parti di un gira oficial pa tur seis isla caribeño di Reino, cu enfoque riba gobernacion, cooperacion y desaroyo economico . Na Aruba, e mandatario a sostene reunionnan cu gobierno, parlamentario y sector civil pa discuti desafionan clave y futuro di colaboracion entre e paisnan. 

Segun Laclé, e entrevista a bay profundo riba posicion di Hulanda y implicacionnan directo pa Aruba, ofreciendo claridad riba tema cu ta causa discusion den sociedad, manera supervision financiero, autonomia y rol di Reino den region.

E publico lo por mira e entrevista completo awe anochi pa 8’or y mei riba pagina di Facebook di Noticiacla y su canal di YouTube, unda e conversacion promete pa trece informacion importante y perspectiva directo di un di e figura mas clave den politica di Reino actualmente.