Gobierno di Aruba a actua pa frena impacto global

ORANJESTAD – Gobierno di Aruba ta sigui de cerca desaroyonan global y ya a tuma medida concreto pa proteha poder di compra di ciudadano, den medio di tension internacional cu por impacta prijs di petroleo y costo di bida. 

Durante un rueda di prensa, Mike Eman hunto cu Minister di Finansas Geoffrey Wever a indica cu, aunke Aruba no por controla situacion mundial, gobierno tin responsabilidad pa anticipa y limita impacto riba economia local.

Gobierno a confirma cu tin un sistema di “hedging” activo cu ta proteha prijs di awa y coriente te fin di aña, pero aumento di petroleo ainda ta refleha den gasolin y transporte.

Pa mitiga e efecto riba pueblo, varios medida ya a wordo implementa, incluyendo aumento di pensioen, eliminacion di prima AZV pa pensionadonan vulnerabel, apoyo den salud, enseñansa y asistencia social.

Ademas, gobierno lo inicia dialogo cu sector priva pa logra un aumento gradual di salario minimo, cu meta di yega na nivel di bestaansminimum.

Den caso cu situacion mundial empeora, gobierno ta considera paso adicional manera absorbe parti di aumento di costo y pospone gasto no urgente pa proteha economia.

Apesar di incertidumbre, economia di Aruba ta keda relativamente stabiel, cu turismo sigui crece. Gobierno ta indica cu lo mantene vigilancia constante y adapta politica segun desaroyonan internacional.