Iglu Cruise: Aruba den e 10 atracionan miho di Caribe

MIAMI - For di jardinnan na Barbados te na beachnan famoso mundialmente, e lista ta destaca e experiencianan cu a haya e mihor evaluacion den islanan. Asina e ultimo investigacion di IGLU Cruise ta raporta, segun e portal Travel & Leisure.  Sea cu bo ta amante di beach, fanatico di bida silvestre of experto den piña colada, Caribe tin algo pa tur hende. Pero cu mas di 700 isla — cada un cu su propio ritmo, sabor y estilo — scoge un destino por bira dificil. Ey mes un informe nobo di Iglu Cruise ta bin util.

Den luna di maart, e compania di crucero a publica un ranking di e mihor atraccionnan den Caribe. Na prome lugar ta Hunte’s Gardens na Barbados. Pa crea e informe, e equipo a analiza dato di TripAdvisor pa identifica e 60 atraccionnan mas popular y despues calcula e porcentaje di reseñanan di cinco estrella (“excelente”) pa cada lugar. Hunte’s Gardens, cu mas di 90% evaluacion excelente y acceso tur aña, a sali como ganador claro.

Na di dos lugar ta Grace Bay Beach na Turks and Caicos, cu 89% evaluacion excelente. E beach ta conoci pa su arena blanco perfecto y awa claro y turkesa, ideal pa landa y snorkel.

Aunque hopi di e top 10 ta playa — manera Flamenco Beach na Puerto Rico (3), Playa Paraíso na Cuba (5) y Eagle Beach na Aruba (8) — e lista tambe tin opcionnan mas aventurero.

Por ehempel, na lugar 4 tin Stingray City na Grand Cayman, unda bishitantenan por mira y interactua cu manta raya den nan habitat natural. Esaki ta un experiencia unico, cu casi 86% evaluacion excelente. E mihor tempo pa bishita ta entre december y april, ora clima ta mas calido y seco.

Lista completo:

Hunte’s Gardens – Barbados

Grace Bay Beach – Turks and Caicos

Flamenco Beach – Puerto Rico

Stingray City – Gran Caimán

Playa Paraíso – Cuba

Cayman Crystal Caves – Gran Caimán

Blue Hole – Jamaica

Eagle Beach – Aruba

Valle de Viñales – Cuba

The Baths National Park – Virgen Gorda