Trump ta bisa guera contra Iran ta casi cla, pero sin fecha di fin

WASHINGTON - Presidente Donald Trump a bisa atrobe cu e guera contra Iran ta casi kaba. “Nos ta cerca di termina e trabou,” e la bisa den un discurso for di Casa Blanco. E  no a duna un fecha cla pa fin di e guera. Si a bisa cu Merca lo aumenta bombardeonan riba Iran den e proximo dos te tres siman. “Nos lo manda nan bek na epoca di piedra.” Segun Trump, Merca ya a logra casi tur su metanan. E la clama cu marina y fuerza aerea di Iran a wordo destrui, y cu Guardia Revolucionario Islamico a keda hopi debilita. Tambe el a bisa cu capacidad di Iran pa lansa misiles y dron a haya un golpe grandi, mescos cu su programa nuclear.

Trump no a menciona cu Iran ainda ta haci atakenan tur dia cu misiles y drone. Mas tempran e dia ey, Trump a bisa cu e  no ta preocupa pa uranium enrikeci di Iran, pasobra esey lo ta profundo bou di escombro. Den su discurso e la bisa cu lo tuma luna pa Iran por yega na dje.

Segun Trump, cambia e regimen nunca tabata su meta, pero segun el esey si ta pasando. E la bisa cu varios lider a wordo elimina y cu lidernan nobo ta “menos radical y mas racional,” aunque el no a splica riba kiko el ta basa esaki. Mojtaba Khamenei, yiu di lider mata Ali Khamenei, ta wordo mira como un hardliner. Expertonan ta bisa cu Guardia Revolucionario a bira mas dominante ainda. Trump a sugeri cu pueblo iraniano por tuma poder si regimen ta debilita, pero el mes a reconoce cu protesta na Iran ainda ta peligroso pa bida.

Riba prijs di combustible, Trump a bisa cu nan lo baha asina e guera termina. Tambe mercadonan financiero lo recupera. Strait di Hormuz, controla casi completo pa Iran, lo habri atrobe “automaticamente” segun Trump.