Arubiano de Ponte a haya mas di 200 voto den eleccion municipal na Hulanda

DEN HAAG  – Cu un total di 241 voto, e candidato di Aruba Zane de Ponte, a logra gana confianza di votadornan den Hulanda durante e ultimo eleccion municipal. Aunque e resultado no tabata suficiente pa logra un puesto preferencial, e apoyo ricibi ta wordo considera como un señal fuerte pa sigui adelante. “Bo por vota solamente un biaha. P’esey mi ta hopi orguyoso cu 241 persona a confia den mi,” de Ponte a expresa, agradeciendo tur votador cu un “masha danki”.

Durante e campaña, e la enfoca riba e echo pa motiva Caribeñonan Hulandes den Den Haag pa participa den eleccionnan. Pa logra esaki, e la comparti su propio experencianan, no solamente den Hulandes, pero tambe den Papiamento y Ingles, pa asina conecta mihor cu e comunidad. Cada aña, cientos di studiantenan di Caribe Hulandes ta muda pa Hulanda pa studia, traha y busca un miho futuro. Sinembargo, e proceso no ta facil, y hopi ta enfrenta retonan serio. Segun e  candidato, tin poco representante local cu realmente ta comprende e realidad di e comunidad Caribeño, cu a contribui na un falta di confianza den politica local y un participacion abou den eleccionnan. “E echo ta cu hopi di nos no ta vota, pasobra nan no ta sinti nan mes representa. Mi spera cu mi campaña a logra haci un diferencia, aunque sea chikito,” e la bisa.

E la enfatisa cu Caribeñonan Hulandes no ta “bishitante temporal”, pero un parti integral di e comunidad unda nan ta biba. Apesar di no logra un puesto, e la confirma cu lo keda activo na nivel local y lo sigui colabora cu fraccion di D66 den conseho municipal di Den Haag pa mehora servicio pa habitantenan Caribeño. “Nos tambe ta Den Haag,” e la conclui, marcando un mensahe cla di presencia y participacion.