Mama di Natalee Holloway ta haci denuncia na Hulanda contra Joran van der Sloot

ORANJESTAD – Beth Holloway, mama di Natalee Holloway, cu a desaparece na Aruba na 2005, a haci un denuncia na Hulanda contra Joran van der Sloot. Cu esaki e kier cu autoridadnan Hulandes investiga si Van der Sloot ainda por wordo persegui penalmente pa morto di su yiu muher. Van der Sloot (38 aña) a confesa na 2023 den Merca cu e la mata Natalee Holloway cu un piedra. Segun abogado Royce de Vries, cu ta representa Beth Holloway, no ta cla con e investigacion na Aruba ta sigui. P’esey awor ta wordo intenta pa involucra Hulanda den e caso. “Hulanda tambe por hunga un rol y tuma hurisdiccion pa resuelve e caso aki finalmente,” De Vries a bisa.

ATENCION MUNDIAL

E caso di Natalee Holloway, cu a desaparece na 2005 na edad di 18 aña durante un vacacion na Aruba, a hala atencion mundial, pero nunca a wordo resuelve definitivamente. Van der Sloot a wordo detene varios biaha e tempo ey, pero nunca a wordo persegui penalmente pa su desaparicion of morto. Actualmente e ta sera den Peru, unda el a wordo condena pa morto di e estudiante Peruano Stephany Flores na 2010. Ademas, e la wordo condena na Merca pa 20 aña di prizon pa chantaha contra Beth Holloway. E pena aki por wordo cumpli hunto cu su condena na Peru.

INVESTIGACION AINDA HABRI

Segun abogado Annemiek van Spanje, colega di oficina di De Vries, autoridadnan di Aruba a indica na 2023 cu e investigacion tocante morto di Natalee ainda ta habri y lo wordo revisa despues di e confesion di Van der Sloot. “Pero te awor no a haya progreso visible,” e la bisa. Beth Holloway ta yama e denuncia na Hulanda “e ultimo speransa” pa logra husticia pa su yiu muher. “Mi no por imagina cu Van der Sloot lo por biba libre algun dia sin cu e la duna cuenta pa morto di mi yiu muher Natalee,” Holloway a bisa.