Ministerio di Salud a completa traspaso oficial di Hospital Horacio Oduber 'renoba'
Le Lanchon riba prome aña di Iberostar: “Aruba a ricibi nos cu braza habri y futuro ta prometedor”
Minister Wyatt-Ras di Salud y Asuntonan Social ta den Noticiacla LIVE awe
Van der Burg: Un ministerio dedica pa Reino y Union Europeo ta yuda Aruba avansa
Vd Burg: Geschillenregeling lo evita cu HOFA ta keda un ley eterno

Opinion: Propuesta pa cambia nomber di ImSan pa “Dr. Joel Rajnherc Institute”

Posted on 03/9/2026 9:18 am AST | Updated on 03/9/2026 9:19 am AST

Segun Richard Visser, ex-minister di Salud Publico y Deporte di Aruba, e instituto Instituto Medico San Nicolas (ImSan) mester wordo renombra como Dr. Joel Rajnherc Institute, como reconocimiento pa e papel fundamental cu Dr. Joel Rajnherc a hunga den transformacion di e institucion y den desaroyo di cuido medico na Aruba.

Visser ta bisa cu algun institucion ta bira mas cu solamente un edificio; nan ta representa vision, perseverancia y liderazgo. Segun e, ImSan ta un di e ehempelnan aki, y e desarroyo di e centro medico ta estrechamente liga cu liderazgo di Rajnherc.

E idea pa transforma ImSan a cuminsa despues di eleccion nacional di 2009, ora Visser a bira minister. E tempo ey, tabatin un proyecto pa un hospital cardiologico na San Nicolas, pero analisis medico y economico a mustra cu un centro altamente especialisa tabata dificil pa sostene pa un isla chikito manera Aruba. P’esey gobierno a dicidi pa reconsidera e concepto.

Despues di analisis, gobierno a identifica oncologia como un area strategico pa desaroyo. Hopi pashent di cancer di Aruba tabata wordo manda pa exterior pa tratamento, algo cu tabata causa costo halto pa gobierno y carga emocional pa famianan. Si Aruba por ofrece tratamiento di calidad localmente, e isla por yuda su propio poblacion y tambe atrae pashent di region.

Pa logra esey, gobierno a busca cooperacion cu Baptist Health South Florida, un sistema hospitalario grandi den Estados Unidos. E idea tabata pa crea un centro oncologico moderno na Aruba conecta cu specialistanan americano.

Segun Visser, e proyecto tabata depende di un lider fuerte cu por maneha presion politico y administrativo. E persona ey tabata Dr. Joel Rajnherc, kende a acepta e reto despues di su carrera como pediatra.

Bou di su liderazgo, ImSan a bira un institucion medico moderno cu acreditacion internacional, un centro oncologico avansa y sistema di telemedicina conecta cu especialista den Estados Unidos.

Segun Visser, pa e motibonan aki, renombra ImSan como Dr. Joel Rajnherc Institute lo reconoci su contribucion historico y e impacto profundo cu e tabatin riba cuido medico na Aruba.