Vd Burg: No ta dispuesto pa 'cambia' e version actual di HOFA

DEN HAAG / ORANJESTAD – Signatura di Gobierno di Hulanda por a cambia, pero nan pensamento pa cu Aruba su asuntonan no. Esey por a compronde diabierna merdia durante un conferencia di prensa entre secretario di estado nobo di Hulanda pa Asuntonan di Reino Eric van der Burg cu periodistanan di Reino. Riba e tema di HOFA y conversion di debe di covid den fondo di inversion,  Aruba a haya cada biaha un no, como contesta. No pa cambio di contenido di HOFA, y no pa converti e debe di Covid den un fondo di inversion. 

HOFA 

E prome pregunta cu Tito Laclé di Noticiacla a haci na e secretario tabata relaciona cu HOFA. Esaki mirando cu ainda tin un debate local na Aruba si e Ley di Reino HOFA mester wordo cambia di su forma actual, osea cu si mester cambia e contenido. E discusion aki tin lunanan caba andando, pero mirando cu e secretario ta nobo, y di un otro partido, tabata kier a sa si aki, su pensamento ta diferente, cu su antecesornan cu a bisa No. Ademas, partido MEP su lider di fraccion Evelyn Wever Croes un siman ainda a bisa durante IPKO, cu e ta contra e contenido actual di HOFA y cu sin e HOFA actual mes, Aruba a logra bay dilanti hopi y cu tin hasta surplus awor. Mientrastanto Conseho di Minister di Reino a dicidi awe mainta na Hulanda, cu e concepto actual, ta bay pa Raad van State. Ademas a puntra e mandatario cu awor cu RMR a dicidi di entrega e ley na Conseho di Estado (RvS), tin cualke sentido pa “bringa” pa e potencial vershon nobo.

NO TA NO

Pa cuminsa, e mandatario a bisa cu su inclinacion en general ta, cu ora cu bo haci un palabracion, bo tin cu simplemente tene bo mes na dje, di ambos banda. Por tin excepcion pero e ora tur dos partido mester por kier esaki. Hulanda sinembargo, segun e mandatario, no ta mira motibo, mirando cuando beneficio Aruba ta haya si e firma. E ta referi na e cambio di tasa di interes cu ta bira mucho mas faborabel pa Aruba, no solamente awor, pero pa otro debenan cu mester keda refinancia. Ora cu Laclé a bolbe puntre, su contesta tabata: Si mi tin cu duna un contesta cortico, e lo ta un NO”. E la bisa si mesora, cu no ta pornada ta mande pa e Conseho di Estado, pa wak si nan ta bisa cu mester bin cambio. Si nan haya esey, e ora Hulanda ta obliga pa scucha esaki, aunke no ta obliga pa ehecuta e conseho. Scucha e declaracion di van der Burg, AKI