Observacionan di ciudadano ta duna mas claridad riba futuro di Shoco di Aruba

Observacionan di ciudadano ta duna mas claridad riba futuro di Shoco di Aruba

Posted on 03/2/2026 8:37 am AST | Updated on 03/2/2026 8:42 am AST

ORANJESTAD – Observacionan di ciudadano ta duna cada biaha mas informacion tocante e supervivencia di e shoco arubiano. Desde 2020, via e proyecto Shoco Radar di Directie Natuur en Milieu (DNM), a wordo haci 87 notificacion, cu hunto ta forma un bista importante di unda e para proteha ta presenta y unda e ta enfrenta presion.

For di e dato nan ta resulta cu comunidad ta hunga un rol activo den monitoreo di e especie endemico. Di e notificacionan registra entre 2020 y 2026, 83 porciento di participante a indica cu nan a mira por lo menos un shoco. Den 78 porciento di e notificacionan a confirma bida den nisnan, loke ta mustra luga di cria activo cu yiu. E observacion mas comun tabata pareha di shoco, representando 38 porciento di e notificacionan, loke segun DNM ta un señal positivo pa reproduccion.

E informacion colecta tambe ta mustra unda e para nan ta keda mas frecuente. Shoco ta wordo mira cada biaha mas den y rond di area urbano, entre otro na scolnan y campo di deporte cu terreno habri, den zona cu palo tras di barrio residencial y den nis artificial crea riba terreno di scol.

Mesun tempo, e estudio ta señala varios amenaza. Perdida di habitat pa motibo di deforestacion y actividad di construccion ta keda e preocupacion mas grandi, hunto cu disturbio causa pa trafico y recreacion cerca di luga di cria. Tambe tin notificacion di desaparicion of destrucion intencional di nisnan.

Segun DNM, e resultado nan ta subraya importancia di ciencia ciudadano pa maneho di naturaleza na Aruba. E shoco ta considera como para nacional y ta un subespecie endemico proteha cu ta hunga un rol clave den ecosistema. P’esey, residente nan ta wordo yama pa sigui reporta observacionan via e plataforma Shoco Radar, pa por determina miho unda proteccion y medida nan ta necesario.

  • Powered by SETAR