- Hulanda a bin di patras y gana Nicaragua 4-3 den un final dramatico den World Baseball Classic 2026
- Aruba ta conoce su di 4 morto den trafico pa 2026
- Venezuela a logra un victoria di 6-2 contra Hulanda den e World Baseball Classic 2026
- Van der Burg: No ta sostene idea di Eman pa cambia debe di Covid den fondo di inversion
- Vd Burg: No ta dispuesto pa 'cambia' e version actual di HOFA
Grupo Despegar a premia Aruba como e destinacion lider den Latino America
BOGOTA - “El destino con mayor crecemento en ventas en Latino America. Y este reconocemento es para Aruba”, asina a anuncia diaranson anochi riba escenario durante un evento organisa pa Grupo Despegar na Cumbia House na Bogota. Ronella Croes, CEO di Aruba Tourism Authority acompaña pa Jordan Schlipken-Croes, director di A.T.A. Latino America, a acepta e premio aki den nomber di e entidad cu tin como meta pa promove y desaroya turismo riba nos isla.
E reconocemento tabata un combinacion di relacion comercial cu e partnernan principal di grupo Despegar cu ta inclui marcanan renombra manera Viajes Falabella, HotelDo, entre otronan. E evento a reuni e instancianan di biahe cu a traha cu e grupo na nivel di Latino America, mas di 7.000 agencia, como tambe e cadenanan hotelero principal di Colombia y e otro mercadonan strategico maneha for di Colombia, manera Peru, Ecuador y Argentina. En general, a conta cu e hotelnan y e aliadonan di mas importante conecta na e red comercial di e grupo den e region.
Durante e evento a realisa un premiacion breve, caminda a entrega aproximadamente 10 reconocemento na e parternan cu mas a destaca, entre nan 2 destinacion , hotelnan y e top agencianan. E tabata un espacio enfoca riba fortalecemento di relacionnan comercial cu e aliadonan principal.
SIMAN DI ANATO
Despegar ta hunga un rol esencial y ta participa den grandi na e conferencia “Vitrina Turistica” di e Asociación Colombiana de Agencias de Viajes y Turismo – ANATO. E aña aki ANATO a tuma luga for di 25 te cu 27 di februari na Bogota cu e tema “Colombia abierta al mundo” y a conta cu mas di 1.600 exposicion y un publico di alrededor di 10 mil participante pa dia.
“ARUBA ARIBA”
E sorpresa aki a cay den masha bon tera cerca Ronella Croes. E CEO di A.T.A. a gradici tur cu a traha duro pa Aruba por a sobresali y pa prome biaha den historia ta logra un semehante reconocimento. El a referi na e ekipo di A.T.A. Latino America pero tambe e oficina principal di A.T.A. na Aruba, sin lubida tur partner cu a reconoce cu ora traha hunto ta logra cosnan grandi. Ronella Croes a subraya cu nomber di Aruba a resalta banda di un pais manera Panama, considera un “hub turistico” importante pa Latino America. Y nos, Aruba…un isla chikito den Caribe, ta resulta esun cu a crece mas y como tal ta regresa cas cu e premio principal.
“Pa pone un poco mas den contexto, Despegar ta representa no menos di 22% di tur pasahero cu ta yega Aruba desde Latino America, pues ta un socio masha importante cu a presenta un premio hopi prestigioso na nos, esta pais lider pa nan pa e region completo di Latino America”, tabata palabranan di Ronella Croes.
“ORGUYO”
E palabra cu mas a resalta den e prome reaccion di Jordan Schlipken-Croes, director di A.T.A. Latino America tabata “orguyoso”. “Pasobra ta haci un trabou cu e intencion pa logra nos obhetivonan, pero nunca bo ta spera di ricibi un reconocemento. Awo ricibi un reconocemento semper ta special, pero ora ricibi un reconocemento di un compania cu tin un balor di dos biyon di Dollar Mericano, un compania cu ta e mas grandi den Latino America, realmente ta un honor hopi grandi pa Aruba”. Jordan Schlipken-Croes a termina sigurando cu esaki, atrobe, ta un momento di orguyo pa henter e ekipo di A.T.A. y pa Aruba henter!
TOCANTE GRUPO DESPEGAR
Despegar ta e agencia di biahe online lider den Latino America, cu mas di 25 aña di experiencia y operacion na mas di 20 pais, incluyendo un presencia fuerte na Colombia. E ta ofrece un plataforma integral pa reserva vuelo, hotel, pakete, huur di auto y actividadnan.
A funda Despegar na aña 1999 y desde cu a fund’e e ta un ehempel di digitalisacion di turismo den e region. Despegar ta presente na Colombia, Argentina, Bolivia, Brasil, Chile, Costa Rica, Ecuador, El Salvador, Guatemala, Honduras, México, Nicaragua, Panamá, Paraguay, Perú, Puerto Rico, República Dominicana, Estados Unidos y Uruguay.
VIDEO: Maduro: Si nos sigui asinaki, e cantidad di turista cu ta bin Aruba lo hoga nos isla
ORANJESTAD – Si nos sigui asinaki, e cantidad di turista cu ta bin Aruba lo hoga nos isla. Asina e pionero di concepto di Timeshare na Aruba, Raymond Maduro a bisa recientemente den e programa Noticiacla LIVE. Maduro ta e persona cu a introduci Aruba cu e concepto hotelero di Timeshare den añanan 70, cu hotelnan manera Aruba Beach Club, Playa Linda, Casa del Mar y Costa Linda. Segun Maduro, un persona di Nacionan Uni a bisa cu Aruba a surpasa e cantidad ey caba.
ATA a honra Ewald Biemans pa su dedicacion na bolsa turistico ITB di Berlin
BERLIN - Aruba Tourism Authority (A.T.A.) cu gran honor a reconoce Ewald Biemans pa su dedicacion remarcabel y tur e añanan cu el a inverti promoviendo Aruba na Europa. E momento special aki a pasa durante e presencia di Aruba na ITB Berlin, hunto cu hopi partner di e industria, y den conmemoracion di 40 aña di Status Aparte, 50 aña di nos Himno y Bandera y e di 60 aniversario di ITB.
Hoogervorst: Aunke e debe ta bahando, Aruba mester di HOFA
ORANJESTAD – Aruba mester di HOFA, aunke cu cos ta bayendo bon. Asina e presidente di e colegio di supervision financiero pa Aruba CAFt, drs Hans Hoogervorst a bisa Tito Laclé den e programa Noticiacla LIVE diahuebs anochi. E pregunta specifico riba e ponencia di parlamentario di MEP Evelyn Wever Croes, cu durante reunion di IPKO recientemente a bisa cu Aruba no mester di e ley di reino HOFA, mirando cu Aruba ta bayendo bon caba sin dje. Hoogervorst a admiti cu Aruba ta bayendo bon, pero, cu ainda Aruba tin un debe!. Y pa seguridad pa futuro, esey ta suficiente motibo pa tin HOFA toch.
Consalves: Aruba lo por dicidi entre mei y juni riba re-apertura di buelonan cu Venezuela
ORANJESTAD – Segun e hende di mision di Hulanda Carmen Consalves den un entrevista cu e periodista venezolano Román Lozinski, e Prome Minister di Aruba Mike Eman ta preve di tuma un desicion entre mei y juni riba e posible reapertura di buelonan entre Aruba y Venezuela. Segun e informacion comparti, gobierno di Aruba ta sigui evaluando e situacion politico y di seguridad na Venezuela, hunto cu consulta cu autoridatnan den Reino Hulandes. E decision final lo depende di varios factor, incluyendo desaroyo den e situacion regional y e condicionnan pa garantisa control y seguridad den trafico aereo.
FCCA ta inverti 46 miyon florin den casnan social na Aruba
ORANJESTAD – Woningstichting FCCA lo inverti un total di 46 miyon florin den construccion di entre 304 y 370 casnan social na Aruba. Mitad di e fondo ta bin for di gobierno, mientras e otro mitad ta bin for di e fundacion mes. Segun e involucradonan, e situacion riba mercado di vivienda na Aruba ta preocupante. Demanda pa cas y pa tereno di construccion ta hopi halto.
Aruba ta fortalece conexion aereo na Routes Americas 2026 na Rio de Janeiro
ORANJESTAD — E team di Aviation Business Development di Aruba Airport Authority N.V. (AAA) conhuntamente cu Aruba Tourism Authority (A.T.A.), ta representando Aruba e siman aki na Routes Americas 2026 na Rio de Janeiro, e evento lider den desaroyo di servicio aereo di e region. Cu mas di 20 reunion programa cu e aerolineanan y partnernan clave den e industria, e delegacion ta enfoca riba desaroyo di red y identifica oportunidadnan strategico di crecemento pa sigui fortalece e conectividad global di Aruba. Entre e aerolineanan nobo confirma pa reunion, cu actualmente no ta opera pa Aruba tin; Air France–KLM, Breeze Airways, Alaska Airlines, JetSMART y Condor, ademas di otro partnernan existente cu ta di gran balor pa Aruba.
Follow NoticiaCla
