Hulanda ta pone placa disponibel pa seguridad alimentario pa nos islanan

DEN HAAG – Gobierno Hulandes kier establece un fundacion nobo cu mester fortalece seguridad alimentario riba seis isla Caribense di Reino. Ta trata di Stichting CariFoodFund (CFF), pa cual 18 miyon euro lo wordo pone disponibel como capital inicial. Esaki ta resulta di un carta di staatssecretaris Eddie van Marum di Asuntonan Interno y Relacionnan di Reino na Tweede Kamer. Establecemento lo wordo presenta via e asina yamado procedimiento di pre-avis riba base di Comptabiliteitswet 2016. Kamer tin 30 dia pa haci pregunta adicional prome cu fundacion wordo establece efectivamente. Cu e fondo aki, gobierno kier reduci dependencia di importacion di cuminda riba Aruba, Corsou, Sint Maarten, Boneiru, Sint Eustatius y Saba. E islanan ta hopi dependiente di cuminda importa. Segun gobierno, e dependencia ey a resulta extra vulnerabel desde pandemia di corona y tension geopolitico, specialmente pa producto frescu manera berdura, fruta, lacteo, pisca y carni.

FONDO

Fundacion lo mester maneha un fondo rotativo. Esaki kiermen cu placa no ta wordo gasta un solo biaha, pero ta bira disponibel di nobo via prestamonan. Empresarionan den agricultura, horticultura, ganaderia y piscamento lo por haci uso di diferente producto di prestamo, incluyendo prestamo cu interes abou y prestamo subordina. Ministerio di Asuntonan Interno y Relacionnan di Reino lo deposita 18 miyon euro como capital propio den fundacion. Via cooperacion cu banco y fondonan di pension, e suma aki mester wordo amplia. Intanto a ricibi seis asina yamado Letters of Interest di institucionnan financiero. Expectativa ta cu fondo lo por crece te minimo 50 miyon euro. Ademas di financiamiento, fundacion kier establece un academia pa desaroyo di conocemento, entrenamento y apoyo na empresarionan y gobiernunan riba islanan.

PRESUPUESTO TOTAL 

Presupuesto total pa seguridad alimentario ta 24 miyon euro. Seis miyon euro ta reserva pa subsidio y contribucion na gobiernunan local pa medida di politica y infrastructura. Establecemento di fundacion ta toca e prome pilar: stimula empresariado via e fondo revolverende. Segun gobierno, conscientemente a escoge pa un fundacion independiente y no pa ehecucion via organizacionnan existente. Asina por atrae financiamiento priva y por dirigi mas especificamente riba sector di produccion di cuminda. Si Tweede Kamer no haci objecion, fundacion por start ainda e aña aki cu apoyo na empresarionan den sector agrario.