• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

ANALISIS: Dia di San Valentino: Amor berdadero of un trampa comercial?

Scirbi pa Tito Laclé

Cada 14 di februari e mesun debate ta bolbe na superficie. Dia di San Valentino! E ta un celebracion sincero di amor — of un invento comercial pa bende flor, hoya y cena caro? E biaha aki mi a dicidi di para keto na e tema y analisa. Mi mes, no ta kere mucho den dje, y ta considere un dia comercial. Pero asina mes, depende di e ambiente, por celebre. Pero hunto cu mi, mi sa cu tin miles cu tin e dilema, y tin cu tin’e mas pio cu otro. Laga mi splica.  Pa algun hende, e dia ta  special. Un momento pa para keto, mustra afecto y honra nan pareha. Pa otro, e ta parce chantaje emocional patrocina pa comercio. E problema no ta e flor ni e regalo. No. E problema ta e expectativa.

NEGOSHI DI AMOR

Dia di San Valentino a bira un evento comercial grandi. Tur caminda. No solamente aki na Aruba. Floresteria, hoyero y restaurantnan ta prepara lunanan adelanta. Prijs ta subi. Menu ta mas caro. Publicidad ta grita: “Si bo stima, mustra.” “Si bo no mustra, e ta sospechoso.” Amor riba e dia aki, ta bira algo cu mester wordo proba publicamente y financieramente. Un regalo no ta malo. Pero ora e recibo ta bira e midi di e afecto (cuanto bo a paga pa e regalo), sinceridad ta perde balor.

PRESION EMOCIONAL

San Valentino ta crea un  standard pa intimidad: Tur hende mester celebr’e riba e mesun dia, den forma similar. Awor, si tur dos den e pareha gusta e ritual, no tin problema. Pero awor e cos ta bin! Si un di e dos den e pareha ta un creyente fuerte y e otro ta considera e dia un invento comercial, tension ta surgi. Y ami mes a experencia esaki personalmente. 

E persona cu gusta e dia por sinti cu rechazo ta indiferencia. E persona cu no ta kere den e dia,  por sinti cu ta wordo forsa pa gast . Y asina e conflicto ta nace. E ta un presion financiero innecesario? Den hopi caso, si.

Riba un isla chikito manera Aruba, unda casi tur cos ta importa y mas caro, demanda ta subi y oferta ta limita. Prijs di flor y cena ta subi mas. Presion pa “no keda atras” ta aumenta. Amor no mester keda depende di capacidad financiero. Pero cultura ta manda e mensahe si, cu “si bo no haci suficiente, bo no ta stima suficiente”. Esaki ta peligroso.

REALIDAD DI UN ISLA CHIKITO

Den un comunidad chikito, tur cos ta visible. Red social ta amplifica comparacion. Bo ta mira ken a ricibi e ramo di rosa mas grandi, ken a bay e restaurant luhoso, ken a publica e sorpresa romantico. Y e comparacion aki ta crea e competencia silencioso. Y competencia emocional ta costa placa. E ora bo ta puntra, con pa maneha esaki?

E solucion ta pa no ignora e dia ni rindi completamente na e presion. E solucion ta comunicacion. 

Prome cu 14 di februari, e pareha mester papia claro cu otro: Kiko e dia ta nifica pa nos? No pa e mercado. No pa Instagram. Pa nos.

Si un pareha aprecia simbolismo, burla no ta respetuoso. Si e otro no ta kere den participa den gasto exagera, obligacion no ta husto.

Un compromiso ta madures. Celebra, pero na bo propio termino. Por ehempel: Un carta scirbi cu man, un cena haci na cas. un paseo simple na playa, un gesto creativo sin gasto extremo. Romance no ta depende di precio, sino di intencion. Pero awor e pregunta mes ta bin. E pregunta di mas grandi

Dia di San Valentino ta un fraude? No necesariamente. Amor berdadero ta construi den dia ordinario: den atencion, respeto, consistencia. Si 14 di februari ta un extension di esaki, e por ta bunita. Si e ta unico momento di esfuerzo, e ta marketing.

MI PENSAMENTO FINAL

Dia di San Valentino tin solamente poder si nos duna’e e poder ey. Ami mes personalmente, ta pensa y ta bisa esun cu mi ta cune, ‘Dushi, Amor no mester un fecha pa existi!”. . Y si un dia ta crea mas ansiedad cu conexion, tal vez e problema no ta e fecha, sino e manera cu nos a permiti e mercado defini nos romance. Exito!