ANALISIS: Carnaval di Aruba: Nos ta normalisa conflicto a costo di calidad?

Scirbi pa Tito Laclé

Durante decenianan largo, Aruba a proclama su carnaval como e mihor di region — hasta di mundo. E no tabata solamente un fiesta, sino un marca nacional. Un producto cultural. Un motor economico. Un simbolo di creatividad Arubano. Pero casi cada temporada ta wordo marca awor pa polemica: discusion riba estilo di musica, desacuerdo riba criterio di evaluacion, pelea publico entre musico y banda, cuestion riba cambio di localidad, friccion entre grupo y organizacion. Loke cu antes tabata ‘parce’ un incidente, awor a bira e norma. Y e pregunta incomodo ta si nos a cuminsa acepta conflicto como parti normal di identidad di carnaval — aunke e ta afecta calidad?

ORA DRAMA BIRA CUSTUMBER

Bo lo bisa, cu esaki ta algu mundial y ta pasa tur caminda. Mi sa. Mi sa cu tension creativo ta natural den cualkier mundo artistico. Carnaval ta competitivo. Orguyo y emocion ta hopi. Pero, y awor e pero ta bin.. Pero tin diferencia entre competencia fuerte y instabilidad structural.

Si tur aña ta wordo marca pa conflicto, si rednan social ta bira e escenario principal di pelea, e narrativa sigur ta cambia. E ora e conflicto no ta e by-product mas, sino e la bira e protagonista. Y nos gusta pelea y bomboshi. Problema ta cu percepcion ta forma y bira e reputacion. E riesgo no ta e desacuerdo. E riesgo ta e normalisacion di e asunto.

CALIDAD TA PAGA E PRIJS?

Carnaval no ta solamente un celebracion. E ta un produccion cultural grandi cu ta depende di coordinacion, planificacion y confiansa mutuo. Si energia creativo ta consumi den pelea riba tradicion versus modernisacion, menos energia ta keda pa innovacion. Si decisionnan logistico ta wordo cuestiona na ultimo momento, e preparacion ta sufri.

Si politica interno ta domina e temporada, diseño di trahenan, arreglo musical y coreografia por keda na di dos lugar. Y esey ta cuminsa afecta e calidad. 

Mi sa cu hopi biaha e publico tal bez no conoce e detaye di e conflicto, pero e ta sinti e diferencia si den nivel di presentacion. Esaki pasobra reputacion ta construi cu consistencia.

SEÑAL DI TEMPO MODERNO?

Si, mi sa tambe cu mundo digital ta amplifica tur conflicto. Tur opinion ta publico. Tur decision ta cuestiona. Pero otro paisnan cu carnaval fuerte ta maneha presion similar cu mas structura. Por ehempel, na Trinidad and Tobago competencia ta intenso, pero e marco institucional ta firme.

E problema no ta e conflicto. No. E problema por ta e falta di gobernacion solido.

PROBLEMA STRUCTURAL

Carnaval na Aruba a crece pa bira un industria cultural serio. Esaki ta exigi profesionalisacion y continuidad mas alla di persona individual. A sugeri te hasta cu porta mester cuminsa pensa pa maneha carnaval como un negoshi y cuminsa paga hende henter aña pa e trabou, envez di ta basa riba ‘voluntarismo’. 

Sin planificacion multi-annual, transparencia financiero. mecanismo formal di mediacion, conseho artistico independiente, criterio cla y consistente, e friccion ta bira un ciclo repetitivo enbes di crecemiento constructivo. Y keremi: inestabilidad repetitivo ta debilita confiansa.

CULTURA OF ZONA DI COMODIDAD?

Na Aruba nos tin e tendencia pa defende tur conflicto como “parti di carnaval”. Pero intensidad emocional no ta mescos cu desorganisacion structural. Normalisa inestabilidad por ta mas facil cu enfrenta necesidad di reforma. Pero excelencia raramente ta convivi cu desorden cronic.

CAMINDA PA DILANTI

Carnaval no mester elimina e debate. E mester organiza e debate. Posibel pasonan por ta e.o. pa desaroya un plan strategico di largo plazo, crea conseho artistico independiente, formalisa proceso di resolucion di conflicto, aumenta transparencia den financia y criterio, inverti den formacion y bin cu intercambio regional. Esakinan no ta matae  pasion, sino mas bien ta proteha calidad. 

PUNTO CENTRAL

E punto central ta keda, cu pa  Aruba mantene su posicion di liderazgo den carnaval regional, e calidad mester supera e ego. Conflicto por stimula creatividad, pero conflicto sin direccion por consumi creatividad.

E pregunta no ta si conflicto lo sigui existi, sino e pregunta mester ta si nos ta dispuesto pa evoluciona e structura di carnaval pa e conflicto fortalece e excelencia en bes di debilit’e? Carnaval mester wordo recorda pa su espectaculo, no pa su pelea.