Corsou ta declara crisis di diabetes: uno di cada cinco adulto afecta

WILLEMSTAD – Corsou ta enfrentando un crisis agudo di diabetes cu ta pone sistema di salud y finanza publico cada vez mas bou presion. Un  di cada cinco adulto riba e isla ta biba cu diabetes y complicacionnan serio ta surgi na edad cada vez mas hoben. Sin medida nacional rapido y efectivo, carga di e malesa ta amenaza di supera capacidad di sistema di salud. Esaki tabata conclusion di diferente actor di salud durante un reunion e siman aki na Curaçao Medical Center. Corsou tin uno di e cantidadnan mas halto mundialmente di paciente cu insuficiencia renal den estadio final como consecuencia di diabetes. Gastonan pa dialisis ta subi te mas o menos cien mil florin Corsou pa paciente pa aña. Profesionalnan di salud ta advirti cu e desaroyo aki no ta sostenible si entrada di paciente nobo no wordo frena. Durante e reunion den hospital a participa representante di Curaçao Medical Center, ministerio di Salud, Medio Ambiente y Naturalesa, Asociacion di Huisartsen di Curaçao, Sociale Verzekeringsbank y NASKHO, hunto cu specialistanan di Diabeter, un centro specialisa den diabetes for di Hulanda. Meta tabata pa determina magnitud di problema, identifica punto critico den atencion y haci acuerdo riba medida urgente. Complicacionnan serio na pia como resultado di diabetes, ta ilustra consecuencia di deteccion tardio y acceso limita na atencion specialisa.

DIABETES TIPO 2

E crisis ta wordo causa principalmente door di diabetes tipo 2, cu tin fuerte relacion cu estilo di bida y den hopi caso por wordo preveni of pospone si detecta tempran y cu bon guia. Na mes momento tin un grupo vulnerabel di mas o menos 180 persona cu diabetes tipo 1, incluyendo mucha. E forma aki no ta prevenibel y ta rekeri tratamento di insulina pa bida largo y monitorisacion continuo. Instrumentonan moderno manera pomp  di insulina y sensor di glucosa ta crucial den e proceso. Sin e tecnologia aki, segun profesionalnan di salud, trata diabetes ta comparabel cu “conduce auto cu wowonan sera”.

Aunke compromiso di profesionalnan di salud ta grandi, Corsou ta keda atras den brinda atencion optimo pa diabetes. Falta di personal specialisa, compensacion limita pa huisarts y tempo di espera largo, entre otro pa atencion di wow, ta contribui na complicacionnan evitabel manera sieguera, amputacion y insuficiencia renal.

Durante e reunion a wordo acorda pa investiga posible solucionnan, incluyendo cooperacion cu un centro internacional di experticia. Participantenan a concorda cu diabetes mester wordo trata como un emergencia nacional. Esaki ta pidi accion coordina riba prevencion, informacion publico, capacidad di atencion, uso di tecnologia, gobernacion y financiamiento estructural. Como siguiente paso, Curaçao Medical Center a propone pa coopera cu un centro internacional di experticia. Diabeter a presenta durante e reunion modelonan di atencion basa riba tecnologia cu ya ta wordo aplica den Hulanda, Islandia y Spaña, y a expresa su disposicion pa coopera cu Corsou. Ademas, a wordo acorda pa actualisa cu urgencia e masterplan nacional di diabetes y traduci esaki den un plan di emergencia concreto cu meta y calendario cla. Conclusion di e reunion tabata unanime: Curaçao ta den medio di un crisis di diabetes y aplasa medida no ta un opcion mas.