Pisas: Licensia mericano ta haci petroleo Venezolano via Corsou posibel atrobe

WILLEMSTAD – Gobierno di Corsou ta mira den un licensia general nobo di Ministerio di Finansia di Merca oportunidad huridico nobo pa actividadnan cu petroleo crudo Venezolano via Corsou. Esaki segun prome minister Gilmar Pisas despues di publicacion reciente di un licensia di sancion nobo door di Estadonan Uni. Segun e gabinete, e licensia nobo ta crea un marco huridico adapta den cual, bou cierto condicionnan, transaccionan ta posibel atrobe cu ta relaciona cu exportacion, almacenah, transbordo y proceso di petroleo crudo di origen Venezolano. Empresanan cu kier ehecuta tal actividadnan mester cumpli cu e condicionnan fiha door di autoridadnan Americano.

USO COMERCIAL

Pa Corsou esaki ta nifica cu infraestructura di petroleo existente, entre otro facilidadnan na Bullenbaai i Emmastad, ta bin atrobe den bista huridico pa uso comercial, semper cu tur requisito internaciona i legal ta wordo respeta. Prome minister ta papia den e contexto ei di oportunidadnan nobo pa utiliza economicanente facilidadnan cu den añanan pasa tabata gran parti fuera di uso. Pisas ta indica cu gobierno, via empresanan di estado 2BAYS i CRU, ta dispuesto pa trata peticionnan pa uso of operacion di facilidadnan di petroleo, semper cu esakinan ta keda dentro di marco huridico vigente i na conformidad cu partnernan internaciona i regulacion. Segun e prome minister, Corsou lo tene su mes estrictamente na e exigencianan di sancion i cumplimiento vigente.

KICO TA DEN E LICENSIA AMERICANO EXACTAMENTE?

E licensia menciona door prome minister Pisas ta General License 46, emiti door di Office of Foreign Assets Control (OFAC), parti di Ministerio di Finansia di Merca.

Medionan Americano i documentacion OFAC ta clarifica cu e licensia aki no ta un exoneracion general di e sancionan contra Venezuela i compania estatal di petroleo PDVSA.

E licensia ta permiti cierto transaccionan relaciona cu petroleo, pero solamente ora esakinan ta wordo ehecuta door di asina yama “established U.S. entities”: empresanan estableci bou lei Americano cu ta cumpli cu condicionnan estricto. Entre otro, tin exigencianan tocante estructura di contrato, trafico di pago i control huridico. Esaki ta nifica cu Corsou of empresanan di Corsou no por importa, almacena of proceso petroleo Venezolano di forma independiente fuera di e marco di sancion Americano.

Actividadnan na Corsou ta solamente permiti ora nan ta parti di un transaccion cu ta keda bou e licensia Americano i ta wordo ehecuta door di un parti Americano permiti. Fuente Americano tambe ta enfatisa cu General License 46 no ta relaciona cu exploracion of produccion na Venezuela i tampoco no ta implica un reapertura automatico di actividatnan di refineria. E sancionan mas amplio contra Venezuela ta keda na vigor; e licensia ta ofrece solamente un apertura limita i claramente delimita den termino huridico.