Fitch ta na Aruba pa evalua ‘rating’ anual di nos isla

ORANJESTAD - Diamars mainta, Minister di Finansa  Geoffrey Wever, hunto cu Directie Financiën y Directie Buitenlandse Betrekkingen a reuni cu un di e tres agencia principal di rating internacional: Fitch Ratings. E reunion a tuma lugar den cuadro di e evaluacion anual di rating di Aruba. Despues di esaki, ta dura algun siman prome cu Aruba haya sa kico e rating pa nos isla ta bira. Basa riba e decision aki, institutonan financiero internacional por dicidi si ta fia Aruba placa of no. 

RATING AÑA PASA

Fitch Ratings aña pasa a upgrade  Aruba su rating pa BBB-, for di BB+ di aña pasa, y cu un perspectiva positivo. Segun e instancia mericano, esaki ta reflehá progreso significante den reduccion di debe di gobierno, sostene pa surplusnan fiscal halto y gobernacion fuerte. “Economia di Aruba, impulsa pa turismo, a crece cu 6.8% na 2024, cu un crecemento den futuro cual nos ta spera di modera”. E cuadro fiscal segun Fitch, fortalece pa sosten di Hulanda, ta inclui metanan pa surplus presupuestario y reduccion di debe. E surplusnan di cuenta coriente di Aruba y e aumento di e reservanan internacional ta reforsa su stabilidad financiero. “Sinembargo, nivelnan halto di debe y dependencia economico riba turismo ta trece riesgonan”.