Partido VVD ta haya cartera di secretario nobo di Asuntonan di Reino

DEN HAAG – E ministerio di Asuntonan Interior y Relacionnan di Reino lo cay como un cartera coherente na CDA, cu ademas un secretario di estado pa Relacionnan di Reino y Gobierno Efikas for di VVD. E nombernan mes ainda no ta conoci y lo keda publica despues. VVD ta ricibi e ministerio di Husticia y Seguridad y e ministerio di Infraestructura y Awa. E ministerionan di Agricultura y Educacion ta bay pa D66.

PROME MINISTER 

Ya tabata conoci cu e ministerio di Asuntonan General ta bay pa lider di D66, Rob Jetten, kende lo bira prome minister. E representante di VVD, Eelco Heinen, ta keda minister di Finanzas. E candidatunan pa minister y secretario di estado lo wordo anuncia mas despues. E gabinete minoritario, segun expectativa, lo para riba e bordes riba 23 di februari.

‘TEMANAN TIPICO DI PARTIDO’

“Mi ta hopi contento cu nos ta mira cu tur tres partido por tuma riba nan mes un cantidad di temanan cu ta tipicamente combina cu nan,” Jetten a bisa durante e anuncio di e puestonan. “Pero tambe cu nos, como partido, a distribui e tareanan grandi y ambicionnan, pa cu tur hende por traha bon.” Loke ta hala atencion ta cu, mescos cu e gabinete-Schoof, un cantidad di minister lo no tin un ministerio propio. Asina, Asilo y Migracion, Vivienda y Ordenamento Espacial, y Clima y Crecemento Verde lo cay bou di otro ministerio. E ministernan aki lo tin aun un presupuesto propio. “Nos ta bay pa un gobierno chikito y eficaz. Esaki ta nifica cu nos no lo inventa ministerionan nobo,” Jetten a declara.

MINISTER NOBO

E secretario di estado di Economia lo ocupa tambe cu economia digital y soberania. “Pa promé biaha lo tin un hende den gabinete cu tin tur temanan digital den un solo man,” Jetten a bisa. Tambe lo bin un minister nobo: minister di Obra y Participacion, kende lo cay bou di e ministerio di Asuntonan Social y Empleo. Loke tambe ta resalta ta cu Asilo y Migracion y Vivienda y Ordenamento Espacial lo keda como puestonan ministerial. Lider di CDA, Henri Bontenbal, no a kier bisa cua puesto e   tabata desea. El a subraya, mescos cu lider di VVD, Dilan Yesilgoz, cu nan a wak e cuadro total. El a bisa cu e ta hopi contento cu CDA lo provee e minister di Economia y cu esaki ta importante pa inverti den “e economia di futuro”.

BONTENBAL NO TA DEN GABINETE

Maske tin ainda hopi cos cu no ta cla, ta sigur cu Bontenbal no lo ricibi un rol den e gabinete nobo. E lider di CDA lo keda como presidente di fraccion den Parlamento. Ainda ta keda e pregunta kiko lider di VVD lo decidi hasi. Siman pasa el a bisa cu el no tabata sigur ainda y cu e lo resolve e puzzel“den e dianan venidero”. Den gabinete-Jetten, D66 cu 26 asiento lo ricibi 7 puestonan ministerial, VVD cu 22 asiento lo ricibi 6, y CDA cu 18 asiento lo ricibi 5. Den total lo tin diez secretario di estado: cada partido lo ricibi tres y lo tin un secretario di estado sin afiliacion di partido.

SECRETARIO DI ESTADO DI ESCANDALO DI TOESLAG

Cerca e ministerio di Finanzas lo keda un cara conoci. Fuentes a confirma   cu Sandra Palmen-Schlangen, kende ta sin partido desde cu NSC a laga e gabinete, lo keda como secretario di estado pa Recuperacion y Toeslag. E partido nan a acorda cu tin mester mantene continuidad den e maneho di e escandalo di toeslag. Probablemente el lo keda den su funcion te ora e escandalo di toeslag ta resuelto completamente.