Aruba ta mas caro cu otro islanan y mucho druk

Aruba ta mas caro cu otro islanan y mucho druk

Posted on 02/3/2026 10:39 am AST | Updated on 02/3/2026 10:45 am AST

ORANJESTAD – Un percepcion cu tin ultimo tempo riba varios publicacion internacional, ta mustra e mesun proyeccion: Aruba ta mucho caro (compara cu otro islanan, manera Corsou mes) y ta hopi druk, particularmente cu tin mucho hopi turista. Un publicacion particular e siman aki, journee-mondiale, ta dedica atencion na e tema cu tin varios isla den Caribe cu ta mustra caro, pero no ta. Aki ta usa e.o. Corsou, unda cu ta bisa cu e isla bisiña ta 40% mas barata cu Aruba, pero cu mes estetica colonial hulandes. Cu otro palabra, si nan dos ta ‘mustra’ mescos pero unda uno ta mas caro cu e otro, scohe esun mas barata, esta Corsou. 

ARTICULO PAGA

E berdad ta tambe cu hopi biaha ta trata di articulonan di personanan cu ta wordo paga pa scirbi di nan experiencia, y cu por wordo mira como e asina yama ‘advertorials’. Asina mes, e ta keda publicacionan cu por haci un impacto sea positivo of negativo. Ora cu un publicacion bisa cu Aruba ta mucho caro, no necesariamente mester ta negativo, ya cu e ta bisa mes momento cu e ta un destinacion pa turista cu tin forza financiero, y cu esey, calidad mas halto di bida. E tipo di turista cu autoridad di turismo local, ta boga p’e. 

MUCHO TURISTA

Un otro fuente recientemente cu Noticiacla a tuma nota di dje, ta  ta di un vlog di un persona Mericano cu a traha un vlog, resumiendo varios isla tras di otro, unda cu Aruba tambe tabata bishita. Aki e ta bisa cu  Aruba ta hopi bunita, hopi pa ofrece, pero ta mucho americanisa y tin mucho hopi turista. Algo cu ta wordo mira como sumamente negativo. Esaki ta traha negativo pa e turista cu kier trankilidad, riba calidad. Pero no necesariamente ta nifica cu e ta core cu bishitantenan potencial. 

MAS MESCOS

Noticiacla a nota si tambe cu mas y mas publicacionan ta refleha mesun cos, unda cu nos isla ta wordo presenta como caro, y cu mucho hende. Mientras cu e parti di caro, no mester ta necesariamente malo, pasobra e ta atrae turista cu mas forza di compra, e parti di ta ‘mucho yen’, si ta un punto cu no ta positivo.  Asina nos isla ta wordo proyecta riba e portal mericano, cu ta toca varios destinacion cu ta mustra caro, pero no ta. Den e cuadro aki, Corsou ta wordo proyecta como un isla mas barata cu Aruba, y tambe cu menos hende.  NOTA: E potret ta un simulacion di un situacion cu ta describi den e articulo adhunto, y no un potret real. 

  • Powered by SETAR