Bill y Hillary Clinton ta bai testifica toch den caso Epstein

WASHINGTON - Bill y Hillary Clinton lo bai testifica toch pa un comision di e Camara di Representantenan di Merca cu ta investigando e caso rond di e delincuente condena sexual Jeffrey Epstein. E ex-presidente y e anterior minister di Exterior a opone nan mes hopi tempo contra testificacion, pero awor nan a cede na e deseo di e presidente di e comision y hopi miembronan di Congreso. Mañan e Camara tabata mester vota riba posibel persecusion penal contra e Clintonnan, pa motibo di desprecio pa Congreso. Esaki pues no lo socede. Aun no ta conoci ki ora Bill y Hillary Clinton lo testifica.

EPSTEIN FILES

Bill Clinton tabata presidente di Merca for di 1993 te 2001. Su nomber ta aparece den e Epstein Files, e miyonan di documento di e investigacion contra e homber cu, hunto cu su complice Ghislaine Maxwell, a maltrata y exploita hoben muhennan sexualmente. Den e documentonan ta indica, entre otro, cu Clinton a usa avion di Epstein algun biahe na inicio di añanan 2000. Tambe tin potretnan unda el ta visible den un piscina y hunto cu un muhé cu no ta identifica. Clinton nunca a wordo acusa pa ningun victima di Epstein. E ex-presidente ta bisa tambe cu el no tabata sabi nada di e mal comportamiento sexual di Epstein. Segun su declaracion, el a corta contacto cu Epstein na 2006, prome cu Epstein a wordo acusa oficialmente.

DIFERENCIA CU PRESIDENTE DI COMISION

Bill y Hillary Clinton ya a presenta declaracionnan por escrito tocante loke nan tabata sabi di Jeffrey Epstein. Te awor nan no tabata kier testifica, pasobra nan ta opina cu e presidente republicano di e comision, Comer, no ta conduci e investigacion bon. Nan ta reprocha Comer tambe pa politica di partido; segun nan, el ta laga su mes wordo usa pa presidente Trump pa pone Democratnan y oponentenan den un mal lus. Comer a bisa anteriormente cu e invitacionnan pa e Clintonnan a wordo vota y cu ningun hende no ta riba e ley.

ROL DI HILLARY

Hillary Clinton tabata minister di Exterior bou di presidente Obama for di 2009 te 2013. Tambe e tabata candidato presidencial pa e Democratnan na eleccionnan di 2016, unda el a perde contra Trump. El a bisa cu e nunca a topa Epstein. P’e y su team, e pregunta ta ki relacion e tin cu e caso y pakico e mester testifica. “Comer no por a bin cu un contesta”, segun un portavoz a bisa na december. Esaki ta e prome biaha den mas cu cuarenta aña cu un ex-presidente di Merca ta testifica pa un comision di Congreso. E ultimo biaha cu esaki a socede tabata na 1983, ora Gerald Ford a mester declara tocante politica di Merca na Latinoamerica.