Ex Premier hulandes Balkenende a yega Aruba pa e Common Good Conference

ORANJESTAD - Diahuebs atardi, Prome Minister mr. Mike Eman a ricibi ex Prome Minister di Hulanda Jan Peter Balkenende   na Aeropuerto Internacional Reina Beatrix en conexion cu nan presentacion diabierna den e prome Common Good Conference.  For di aeropuerto, e ex mandatario y actual orador, hunto cu Prome Minister Eman a bay directamente pa Renaissance Convention Center na unda e Expo di Bon Comun tabata tumando luga. Aki   Balkenende   a pasa na varios di e boothnan di e instancianan participante y a haya splicacion di e tareanan importante di e instancianan aki.  Cu yegada di e orador aki, e lista ta completo pa asina por duna inicio diabierna mainta na e conferencia di E Bon Comun. E lista di orado ta extenso y ta cubri un area grandi den e movemento pa cu e Bon Comun.  E conferencia ta conta cu varios orador reconoci  internacionalmente manera Michael Sandel, Jan Peter Balkenende, Govert Buijs, Iain McGrilchrist, Francielle Lacle, Thaïs Franken, Robertico Croes y Esther Emerencia-Gomes. 

E Common Good Conference ta start awe diabierna pa 9'or di mainta y ta termina 4:30 atardi y ta tuma luga na Renaissance Convention Center.