American Airlines ta e prome aerolinea cu cuminsa bula atrobe pa Venezuela

FORT WORTH  — American Airlines a anuncia cu nan ta e prome aerolinea cu ta anuncia plan nan pa restablece servicio nonstop entre Merca y Venezuela. E aerolinea ta den contacto constante cu autoridad federal y ta cla pa cuminsa vuelonan pa Venezuela, dependiente di aprobacion gubernamental y evaluacion di seguridad. Ayera presidente mericano Trump a bisa cu ta habri e espacio aereo y tambe cu avionan mericano por cuminsa bula atrobe pa Venezuela. 

“Nos tin mas cu 30 aña di experiencia conecta venezolanonan cu Merca, y nos ta cla pa renoba e relacion especial ey,” a bisa Nat Pieper, Chief Commercial Officer di American Airlines. “Cu e reinicio di e servicio pa Venezuela, American lo duna clientenan e oportunidad pa reuni cu familianan y pa crea nobo actividad di negocio y comercio cu Merca.”

American Airlines a cuminsa su operacion na Venezuela na 1987 y, prome cu a suspende e servicio na 2019, e tabata e aerolinea mas grandi di Merca na e pais. American ta conecta mas destinacion nonstop cu Merca cu cualkier otro aerolinea den Caribe y America Latina. A traves di e añanan, esaki a significa cu e aerolinea a facilita conexionnan nonstop esencial pa negocio, familia, amigunan, recreacion y viaje humanitario.

American Airlines lo comparti mas detaye tocante su retorno di servicio den e lunanan benidero, mientras cu e ta sigui traha serca cu autoridad federal riba tur permiso necesario y evaluacion di seguridad, prome cu e servicio sea reinicia oficialmente.