Composicion di Jeon di Aruba ta clasifica pa Tumba Festival Corsou

WILLEMSTAD – E hoben artista internacional di Aruba, Jonathan ‘Jeon’ Thiel a logra clasifica su prome composicion pa Festival di Tumba pa Corsou diaranson anochi.  Su composicion ‘Bula Ba’ pa e cantante Djuric ‘Dju Dju V’ Virginie di e banda Icons ta figura entre e 30 nan. E trinta finalista di Tumbafestival a wordo anuncia despues di e di tres y ultimo anochi di preseleccion. E  bandanan  grandi lo ta presente completo cu tur nan tumberonan p e final, cu lo tuma luga riba diabierna anochi na Festival Center na Brievengat.

ERA, Highway Band, Icons, One Flavaz, Quality Sound, Queens y Tempo Music a cualifica cu nan formacion completo pa e lucha final. Cu esaki nan ta domina di nobo e nochi di final, cu tradicionalmente ta dura te den hopi laat, prome cu cu e ganador ta wordo anuncia.

Hunto cu e formacionnan grandi, tambe Menta y Daiquiri Band ta completa e lista di trinta finalista. Tur dos band a logra drenta e final cu un tumba cada uno.

E hurado a anuncia e seleccion di e trinta finalista mes despues di final di e ultimo ronda di preseleccion, ayeranochi. Cu esaki e programa pa e gran final a keda establece, cu ta wordo considera e punto culminante di e temporada di Tumba y cu cada aña ta hala miles di aficionado pa Brievengat.

Diabierna anochi e trinta tumbanan lo compiti pa e titulo, den un final cu ta conoci pa su largo duracion, intensidad y variacion musical, promeco den e oranan tempran di mainta e tumba ganador di 2026 lo wordo designa.