Tormenta grandi di sneeuw e fin di siman aki na Merca por afecta Aruba

ORANJESTAD - Pronosticadornan di Servicio Meteorologico Nacional (NWS) di NOAA ta sigui monitorea un   tormenta di winter (sneeuw) grandi cu lo trese sneeuw pisa, y hagel   pa cientos di miyon di mericanonan, cuminza awe diabierna 23 di januari y sigui te dialuna awor. No ta descarta cu e por afecta varios buelo di e parti aki pa Aruba. Por lo menos 21 buelo diasabra y 15 diadomingo ta programa pa Aruba for di e area aki. Na New York y New Jersey a cancela mas di 1200 buelo caba pa diasabra awor. 

EXCEPTIONAL

Ta spera cu esaki lo ta un tormenta di winter excepcionalmente grandi y severo. Aire peligrosamente friu ta keda den pronostico pa mas cu mita di poblacion di Merca durante e weekend y te inicio di siman benidero. E combinacion di acumulacion significativo di sneeu y ijs, hunto cu tempo extremamente friu, por causa interrupcion di coriente y camindanan yen di ijs cu por keda peligroso mas tempo cu normal despues di un tormenta di winter tipico.