Analisis: Transporte na Aruba: e pregunta no ta Uber, sino con

Analisis: Transporte na Aruba: e pregunta no ta Uber, sino con

Posted on 01/20/2026 10:07 am AST | Updated on 01/20/2026 10:21 am AST

Scirbi pa Tito Laclé

Basa riba e tema di seguridad den trafico, recientemente, via Noticiacla, mi a haci un encuesta chikito, entre casi 200 lector di noticiala, riba e tema di transporte publico. Entre nan, tin e introduccion di e servicio di Uber of LYFT na Aruba. E concepto di transporte UBER y LYFT ta un plataforma di tecnologia cu ta usa un app di smartphone pa conecta pasaheronan cu mester di biahe cu chaufeurnan independiente usando nan vehiculonan personal, creando un servicio di transporte flexibel, riba demanda cu a revoluciona e industria di taxi dor di probecha di e economia di comparti y transacionnan sin placa cash. Y un di e preguntanan tabata e pensamento riba e tema aki. E debate riba introduccion di Uber na Aruba ta wordo presenta hopi biaha como un lucha entre progreso y proteccion. Sin embargo, e resultado di un encuesta chikito reciente ta mustra cu e realidad ta mas matiza y cu e discusion politico mester wordo eleva pa un nivel mas serio y pragmatico.

Cu 36% di esnan encuesta, ta considera introduccion di Uber como un bon paso, y solamente 7% cu ta claramente contra, ta dificil pa ignora cu e resistencia frontal contra Uber ta limita. Mas importante ainda: 58% di e participantenan ta kere cu Uber lo mehora e servicio di taxi, no destrui dje. Esaki ta un mensahe politico fuerte: e poblacion ta pidi mehoracion, no eliminacion.

Naturalmente, 33% ta teme cu Uber lo afecta e sector di taxi negativamente. E preocupacion aki ta legitimo y no por wordo minimisa. Taxi ta representa empleo, inversion personal y structura regulatorio cu a wordo construi den añanan. Pero proteccion sin modernisacion no ta un strategia sostenibel. Si un sistema ta depende riba ausencia di competencia pa sobrevivi, e problema no ta e competencia, sino e sistema mes.

E dato cu 56% di esnan encuesta ta dispuesto pa usa Uber, ta indica cu e consumidor Arubano ta busca opcionnan. No necesariemente e opcion mas barata, pero e opcion mas disponibel. Esaki ta confirma e resultado riba e pregunta unda cu entre esnan encuesta, disponibilidad di transporte (30%) ta mas importante cu prijs (27%). Den otro palabra: e problema principal den transporte na Aruba no ta costo, sino acceso. Por lo menos segun e encuesta chikito aki.

Politicamente, esaki ta pone gobierno dilanti di un decision clave. No actua ta tambe un decision, y e encuesta ta mustra cu gran parti di e poblacion ta cla pa cambio. Pero e cambio aki mester wordo dirigi, regula y implementa cu vision, no laga riba mercado su so.  E asunto aki tabata semper uno delicado politicamente. Cu 400 permiso di taxi vigente, esaki ta pone cu e ta traduci den casi 1000 pa 2000 voto, directo, sin ta mas. Algo cu tur politico ta tene cuenta cu ne. Y como tal, semper a evita pa ‘rock the boat’ riba e tema aki. Den pasado, hopi politico a usa esaki como un instrumento pa ‘haya voto’. Duna un permiso, y haya boshi voto a cambio, como gradicimento. E gabinete anterior, a purba trece cambio den esaki, pa netamente evita e politikeria den otorgamento di taxista. A logra? Ban wak

Introduccion di Uber no mester ta un amenaza pa taxi, sino un oportunidad pa modernisa henter sector di transporte: standard di calidad mas cla, tecnologia, disponibilidad 24 ora, y un marco regulatorio cu aplica pa tur hunga den e mercado.

E pregunta clave pa Aruba no ta si Uber mester wordo permiti, sino con Aruba lo gestiona competencia sin destrui empleo, y con lo garanti cu interes publico ta riba promé lugar.

E encuesta ta manda un mensaje claro: e publico ta kla pa un sistema di transporte mas eficiente, mas moderno y mas accesibel. Awor ta turno di e liderazgo politico pa mustra cu nan tambe ta kla pa decisionnan cu mira mas leu cu temor di corto plazo. Manera semper,  tempo lo mustra. 

  • Powered by SETAR