Opinion: E post cu tur sa tabata bin: clapchi.

Posted on 01/12/2026 2:53 pm AST | Updated on 01/12/2026 2:55 pm AST

Scirbi pa Angela Tiemens

Aunke tabata menos anochi, tabata dieseis anochi consecutivo cu clapchi.

Mi no tin nada mas pa bisa cu loke mi a bisa riba 29 di december.

Pero mi tin preguntanan serio :

Con un solo anochi pa spanta spirito malo y habri caminda pa Aña Nobo a bira dieseis dia di hasi tur loke bo ki ora cu bo ke?

Unda esnan cu ta enforsa ley ta?

Oficialmente clapchi ta permiti te 1 di januari 1’or di merdia.

Esey tabata dies dia pasa.

Y mi ta compronde, tin hopi doño cu ta falta responsabilidad:

mascotanan ainda ta afo riba caminda den e anochinan mas pisá, sin banchi cu nomber.

Esaki ta falta di doño, no di otro hende.

Pero banda di esaki:

Cua doño por cera su bestia den un sigur pa dieseis anochi consecutivo?

Nos mester tene un tiki di compasion:

Tira bo clapchi 30 di december y 1 di januari, y despues warda loke bo tin pa proximo december.

Nos ta biba tur hunto riba e isla chikito aki.

Nos por trata di pensa un tiki riba otro por lo menos?

Y pa e politiconan:

Evalua e asina yama ‘tradicion’ atrobe, of aplica e ley manera mester ta.

Ami, personalmente, no lo keda keto te ora cu e drama bolbe na december.

Follow NoticiaCla