Dowers: Polis a señala cu situacion di trafico a bay for di man na Aruba

ORANJESTAD – “Polis a señala situacion di trafico (na Aruba) practicamente a bay for di man na pais Aruba”. Asina minister di husticia di Aruba Arthur Dowers a bisa diabierna mainta durante un reunion di Parlamento contestando pregunta di parlamentarionan. E reunion tabata a base di peticion di un parlamentario (John Hart di AVP) riba e tema di seguridad di trafico despues di un fin di siman tragico unda cu 3 persona den dos diferente accidente a perde nan bida cruelmente. 

COMISION PA AUMENTA CASTIGO

E mandatario a bisa tambe cu a forma un comision pa cuminsa traha riba e tema y cu ta spera cu den 2 siman di tempo, por haya recomendacionan. Y un di e cosnan cu ta bisa caba ta cu tin cu bay aumenta castigo, cu Ministerio Publico tambe ta  di acuerdo cu ne. Esey kier men cu hopi liher por cuminsa cu e proceso caba pa cambia e landsverordening wegverkeer, y hunto cu ne esun di ley di arma pa aumenta e castigo pa esey tambe. 

HOPI CASO DI HIT & RUN

Dowers a señala tambe cu tin hopi hende cu ta causa accidente y despues ta core bay, cu ta considera un ‘hit and run”.  E la recorda cu den pasado a cambia e ley den Parlamento, debi cu tabatin hende cu ta causa accidente, bay di e sitio, bin bek despues sin cu bo ta wordo deteni. Ley tabata permiti esey, esta cu si bo bolbe despues di algun ora, no ta detene bo. Pero a resulta cu hende tabata bay, recupera, bin bek, pero ya sin e cantidad di alcohol cu nan tabatin den curpa ora cu e accidente a tuma lugar, cu ta nifica cu no por registra e persona e ora cu e la comete e accidente bou di influencia, cu consecuentemente ta afecta e situacion di detencion. Como tal a cambia e ley pa evita esey. Scucha e declaracion di minister Dowers AKI.