Mike Eman a confesa cu e kier pa Wendrick Cicilia bira e proximo lider di AVP

ORANJESTAD – Aunke cu un lider nobo di partido AVP ta keda escohi pa medio di un eleccion democratico, lider actual di e partido Mike Eman, tin su candidato preferencial. Durante e programa Noticiacla LIVE diahuebs anochi, e la ‘confesa’ na e moderador Tito Laclé, cu e kier pa Wendrick Cicilia bira e proximo lider di partido AVP. Si partido kier otro, e ta respeta esey, pero su preferencia ta Cicilia. Y segun e lider actual, no ta pornada e la ‘bolter’ e lista na 2024 y pone Cicilia na posicion number 1 e tempo ey. 

FAMIA EMAN?

Berdad cu den comunidad tin e pensamento cu ta un Eman so por dirigi e partido, y cu esaki lo keda semper asina. Eman a confirma cu miembronan di famia ta hopi cerca den politica y e partido, y ta yuda y pensa riba esaki. “Trevor (Eman:red) ta un, Sigfried, Sigi ta otro y tin algun Sobrino na Utrecht, di cual uno Rebecca Eman ta uno. Pero nos no tin esey na miras ne momentonan aki. Nan tampoco tin esey na miras na e momentonan aworaki. Ora cu Laclé a puntra si asina mes, tin un miembro di famia Eman cu ta prepara of ta wordo prepara pa asumi e posicion di lider, Mike Eman a sigura cu esey no ta e caso. Tempo lo mustra esey. 

WENDRICK CICILIA

Segun Eman, den partido actual tin hopi cu tin e capacidad pero cu tin uno cu ta resalta p’e. “Logicamente mi tin cu laga partido cana su caminda, pero mi ta kere cu ningun hende, lo ta un secreto publico unda mi curazon y mi sentimento ta” Eman a bisa, refiriendo na e hecho cu e la pone Cicilia number 1. “No ta nami pa apunta un lider politico, pero si tin un cu sigur mi ta hopi open den dje y cu tin mi preferencia aworaki cu ta sr Wendrick Cicilia. Na September, e partido lo tin cu tene e eleccion, y Eman ta considera cu mirando cu 1 september ta su cumpleaños, lo ta un bunita forma pa retira e ora como lider di e partido. E la sigura varios biaha den e programa si, cu esey no kier men cu e ta bandona partido, ni su posicion como prome minister, y cu partido lo cumpli cu e promesanan haci durante eleccion. Pa wak e programa completo, click AKI.