Brekelmans: Hulanda ta stop operacionnan hunto contra droga cu Merca pafo di su propio awanan

ORANJESTAD – Hulanda a stop provisionalmente cu e colaboracion operacional cu Merca den lucha contra droga pafo di e awanan territorial. Minister di Defensa Ruben Brekelmans a laga hopi cla dialuna durante su bishita reelampago na Aruba riba Aruba cu Hulanda lo limita su lucha contra droga na su propio awanan territorial y no lo participa den operacionnan Mericano riba laman habri E delimitacion aki ta sigui e decision di Merca pa un enfoke unilateral y militar den region. Hulanda no ta coopera cu e operacion Mericano Southern Spear y no ta pone facilidadnan ni medio disponibel pa esaki. Den su propio awanan, Hulanda lo sigui combati contrabando di droga door di investigacion, detencion y hucio, y no dor di elimina botonan.

KIBRAMENTO CU PASADO

Esaki ta marca un kibramento cla cu pasado. Hulanda y Merca a hiba operacionnan hunto contra droga pa añanan pafo di e awanan territorial, entre otro via e Joint Interagency Task Force South, cu ta wordo lidera pa Estados Unidos. Botonan di Marina Hulandes a opera riba awanan internacional, hopi biaha hunto cu U.S. Coast Guard, cu uso di teamnan di abordaje di Koninklijke Marine. Segun Brekelmans, Hulanda ta sigui den dialogo cu Washington tocante seguridad y intercambio di informacion, pero participacion operacional den accionnan Mericano riba laman habri ta exclui mientras cu nan ta pafo di e marco huridico hunto. E minister a enfatisa cu no tin amenaza militar directo pa Aruba, Corsou y Bonaire y cu e inzet di seguridad actual y refuerzonan planifica lo sigui adelante.